سەرۆک بارزانی و باڵیۆزی بەریتانیا بارودۆخی شنگال تاوتوێ دەکەن

ئاڤا نیوز

 

لە سەڵاحەددین سەرۆک بارزانی پێشوازی لە ستیڤن هیتچن باڵیۆزی بەریتانیا لە عێراق کرد، بارودۆخی شنگال و جێبەجێکردنی ڕێککەوتننامەی شنگالیان تاوتوێ کرد.

 

ڕاگەیێنراوی فەرمی: بارەگای بارزانی ڕایگەیاندووە، لە دیدارەکەدا باس لە پەیوەندییەکانی نێوان حکومەتی هەرێمی کوردستان و حکومەتی عێراق و دەرئەنجامی دوایین سەردانی سەرۆک بارزانی بۆ بەغدا و دیدار و کۆبوونەوەکانی لەگەڵ لایەنە سیاسییەکانی عێراق و باڵیۆز و نێردەی وڵاتان لە عێراق کراوە.

 

زانیاریی زیاتر: بارودۆخی شنگال و پێویستی ئاسایی کردنەوەی دۆخی ناوچەکە و جێبەجێکردنی ڕێککەوتننامەی شنگال بەشەکی دیکەی گفتوگۆکان بوو، سەرۆک بارزانی باسی لەو هەوڵ و قوربانیدانە کرد کە لە پێناو ئازادکردنی شنگال و شکاندنی داعش دراون، کەچی بەداخەوە ئێستا چەند هێزێکی نایاسایی لەوێن کە ڕێگرن لە ئاساییکردنەوەی دۆخی شنگال و گەڕانەوەی خەڵکی ئەو ناوچانە بۆ سەر ماڵ و موڵکی خۆیان.

 

گۆشەیەکی دیکە: دوایین پێشهات و گرژییەکانی ناوچەکە بە گشتی و ڕۆژهەڵاتی ناوەڕاست بە تایبەتی باس کرا، لەگەڵ ئاڵوگۆڕکردنی بیروڕا لە بارەی هەنگاوەکانی چارەسەر و هێورکردنەوەی دۆخەکە، هەردوولا جەختیان لەوە کردەوە کە ناوچەکە بەرگەی گرژی و ئاڵۆزیی زیاتر ناگرێت و پێویستی بە سەقامگیری و ئاسایش هەیە.