دیپلۆماتکارانی عێراق بەیرووت جێدە‌هێڵن

ئاڤا نیوز 

لەگەڵ گریمانەی زیادبوونی گرژییەکان لە لوبنان، دیپلۆماتکارانی عێراق بەیرووتی پایتەختی ئەو وڵاتە جێدە‌هێڵن، داواش لە حکومەت دەکرێت پلانێک بۆ گەڕانەوەی رەوەندی عێراق لەو وڵاتە دابنێت.

وێنە گەورەکە: دوای زیاتربوونی گرژییەکانی ڕۆژهەڵاتی ناوەڕاست بەهۆی کوژرانی ئیسماعیل هەنیە لە تاران، ئێران و هاوپەیمانەکانی هەڕەشەی تۆڵەسەندنەوە لە ئیسرائیل دەکەن و لوبنانیش وەک گۆڕەپانی وەڵامدانەوە و ڕووبەڕووبوونەوەی هەردوولا دەردەکەوێت.

زانیاریی بەدەستهاتوو: سەرچاوەیەکی ئاگادار بە ئاڤا نیوزی گوت:" پێشبینی زیاتربوونی گرژییەکان لەنێوان بەرەی مقاوەمە و ئیسرائیل لە لوبنان دەکرێت، بەوهۆیەش دیپلۆماتکارانی عێراق، بەیرووتی پایتەختی لوبنان جێدە‌هێڵن".

لە لایەکی دیکەوە: لیژنەی پەیوەندییەکانی دەرەوە لە پەرلەمانی عێراق ڕایگەیاند:" پەیوەندییان بە دیپلۆماتکارانی عێراق لە لوبنان کردووە، داواشیان لە حکومەت کردووە پلانی خۆی ئامادە بکات، تا لەکاتی هەر حاڵەتێکی لەناکاودا بتوانێت رەوەندی عێراقی لەو وڵاتە بگەڕێنێتەوە".