دەمیرتاش هاتەدەنگ؛ ڕەتی دەکاتەوە دوای ئازادبوونی لەگەڵ ئەردۆغان کۆببێتەوە و واز لە سیاسەت بهێنێت

ئاڤا نیوز

 

لە وەڵامی ئەو قسانەی بولەنت ئارنچ لەسەر زاری سەڵاحەددین دەمیرتاشەوە کردوونی، دەمیرتاش دێتە وەڵام و دەڵێت: ئەگەر بە مەبەستی نیازباشیش بێت، هیچ کەسێک مافی ئەوەی نییە بە ناوی منەوە قسە بکات. کەی پێویست بکات ڕای گشتی لە بیروبۆچوونەکانی خۆم ئاگادار دەکەمەوە.

 

چیرۆکی سەرەکی: دوای ئەوەی ڕۆژی چوارشەممە بولەنت ئارنچ، سەرۆکی پێشووتری پەرلەمانی تورکیا ڕایگەیاند لەمیانی سەردانەکەی بۆ لای دەمیرتاش لە زیندان پێی ڕاگەیاندووە: دەیەوێت دوای ئازادبوون لەگەڵ ڕەجەب تەیب ئەردۆغان، سەرۆککۆماری تورکیا کۆببێتەوە و واز لە سیاسەت و خۆکاندیدکردنەوە بۆ سەرۆکایەتیی کۆمار دەهێنێت، ئەمڕۆ پێنجشەممە 20-11-2025 دەمیرتاش بە نامەیەکی دەستنووس و بەبێ ناوهێنان بە توندی وەڵامی ئارنچ'ی دایەوە.

 

زانیاریی بەدەستهاتوو: دەمیرتاش لە نامەکەیدا دەڵێت: زیندانیکردنم بۆ ماوەی نۆ ساڵ بەبێ ئەوەی هیچ جۆرە تاوانێکم کردبێت، منی تووشی دۆخێکی زۆر سەخت کردووە. بەڵام خەبات لە پێناو ئاشتی و دیموکراسی و ئازادی گەل، ئیرادەیەکی پۆڵاین و خۆڕاگری دەوێت.

 

دەمیرتاش زۆر لەوە نیگەرانە ئەم جۆرە قسانە بە ناوی ئەوەوە کراون کە دوور و نزیک پەیوەندییان بەوەوە نییە و دەڵێت: لێپرسینەوە لە نیازی ئەو کەسانە ناکەم، ئەو قسانەیان کردوونەتە ماڵ بەسەر منەوە، بەڵام پێویستە هەموو کەس ئەمە بزانێت و لێی دڵنیا بێت، من وەک چۆن بە شکۆ و سەربەرزییەوە هاتوومەتە ناو زیندان، بەبێ ئەوەی ڕێ بدەم کەس شکۆم بشکێنێت و بە سەربەرزی لێرە دەچمە دەرەوە، یان تا دوایین ڕۆژی تەمەنم لێرە بەسەر دەبەم. ئەوە لای من بڕاوەتەوە و مشتومڕ هەڵناگرێت.

 

ئەوەی پێویستە بیزانیت: دەمیرتاش هۆشداری داوە لەوەی هەر جۆرە ڕوونکردنەوە و ڕاگەیەندراو و بۆچوونێک کە ڕاستەوخۆ خۆی بڵاوی نەکاتەوە، پەیوەندی بەوەوە نییە و دەڵێت: نیگەرانم بە بڵاوکردنەوەی قسەی چەواشەکەر، هەڵبەستراو و بەهەڵەدابەر  بە ناوی منەوە. بە داخەوە لایەنی نەرێنیی مانەوەم لە زیندان ئەوەیە چەندین ساڵە ئەمە دەکرێت و کارکردن بۆ ڕاستکردنەوەی هەر هەڵەیەکی لەم جۆرەش وزەیەکی زۆری دەوێت. 

 

لەلایەکی دیکەوە: دەمیرتاش لە کۆتایی نامەکەیدا سەرنجی خستووەتە سەر ئەوەی کە تاکە ڕێگەیەک لە بەردەمیدا مابێت بۆ ڕێگەگرتن لە چەواشەکردنی قسەکانی و بەکارهێنانی قسەکانی بۆ مەرامی تایبەت، ئەوەیە جگە لە هاوڕێکانی لەگەڵ هیچ سیاسەتمەدار و پارێزەرێکی دیکە کۆنەبێتەوە.