هەرێمی کوردستان داوا لە عێراق دەكات هاوردەكردنی ژمارەیەک بەروبووم ڕابگرێت

ئاڤا نیوز

 

وەزارەتی كشتوكاڵ و سەرچاوەكانی ئاوی حكومەتی هەرێمی كوردستان داوا لە ئەنجوومەنی ئابووریی عێراق دەكات، هاوردەكردنی شووتی و كاڵەك و خەیار و پیاز ڕابگرێت.

 

وێنە گەورەكە: ئێستا وەرزی پێگەیشتنی شووتی و كاڵەك و خەیار و پیازە لە هەرێمی كوردستان، بۆ ئەوەی ئەو بەروبوومانەی جووتیاران بازاڕیان بۆ بدۆزرێتەوە، داوا لە عێراق دەكرێت تا ماوەیەكی دیاریكراو ئەو بەرهەمانە لە دەرەوەی وڵات هاوردە نەكات.

 

ڕاگەیێنراوی فەرمی: بەپێی ڕاگەیێنراوێكی وەزارەتی كشتوكاڵ و سەرچاوەكانی هەرێمی كوردستان، لە چوارچێوەی كۆبوونەوەیەكی نێوان وەزیر و ژمارەیەك جووتیاری سنووری پێنجوێن، بڕیار دراوە نووسراوێك ئاراستەی ئەنجوومەنی ئابووریی عێراق بكرێت، بۆ ئەوەی تا ماوەیەكی دیاریكراو لە خاڵە سنووریەکانی عێراق، شووتی و كاڵەك و خەیار و پیاز هاوردە نەكرێن.

 

زانیاریی زیاتر: بەپێی ڕاگەیێنراوەكەی وەزارەتی كشتوكاڵ ئێستا وەرزی پێگەیشتنی شووتی، كاڵەك، خەیار و پیازی جووتیارانی هەرێمی كوردستانە، بەرهەمەكان کوالێتیان بەرزە و  توانای دابینکردنی پێویستییەکانی بازاڕی ناوخۆییان هەیە.

 

ئەمەش بزانە:  وەزارەتی كشتوكاڵی هەرێمی كوردستان و عێراق هەماهەنگیی لە نێوانیاندا هەیە و، ساڵانە لەكاتی پێگەیشتنی هەر بەرهەمێكی ناوخۆ، هاوردەكردنی بەرهەمی دەرەوە قەدەغە دەكەن.