بەهای دینار بەرامبەر دۆلار بۆچی دانابەزێت؟

ئاڤا دیجیتاڵ 

زیاتر لە ساڵێک بەسەر بڕیاری بانکی ناوەندیی عێراق سەبارەت بە نرخی فرۆشتنی دۆلار لە بەرامبەر دیناری عێراقی تێپەڕدەبێت، بەڵام هێشتا نەتوانراوە نرخەکەی لە بازاڕەکاندا کۆنترۆڵ بکرێت. 

وێنە گەورەکە: لە ماوەی یەک ساڵی ڕابردوودا بانکى ناوەندیى عێراق چەندین بڕیار و ڕێوشوینی بۆ دابەزاندنى بەهاى دۆلار بەرامبەر دینار گرتووەتەبەر، بۆ ئەوەی نرخی 100 دۆلار بە 132 هەزار دینار جێگیر بکرێت، بەڵام هەوڵەکان سەرکەوتوو نەبوون. 

لێدوانی فەرمی: ئیحسان شمران، جێگری پێشووی پارێزگاری بانکی ناوەندی بۆ ئاڤا نیوز دەڵێت: دانەبەزینی نرخی دۆلار بۆ دوو هۆکار دەگەڕێتەوە؛ کەمی خستنەڕووی ڕۆژانە و بەهۆی ئەوەی زۆرینەی مامەڵەکانی نێوخۆ بە دۆلارن. ئەمانە وادەکەن "نرخی دۆلار دانەبەزێت و هەر 100 دۆلارێک لە دەورووبەری 150 هەزار دینار بمێنێتەوە".

زانیاری زیاتر: کاردۆ کەمال، پسپۆڕی ئابووری بە ئاڤا نیوزی گوت: عێراق بەشێک لە مامەڵە داراییەکانی سنووردارکردووە بەتایبەت لەگەڵ ئێران، بەڵام قورسە  نرخی دۆلار ببێتە 132 هەزار دینار، کەمترین بڕ کە پێی بگات 145 هەزار دینارە.