نەهرۆ ڕواندزی: دەستێک لەنێو حکومەتی عێراق دژی هەناردەکردنەوەی نەوتی کوردستانە

ئاڤا نیوز

 

سەرەڕای ڕێککەوتنی لایەنە سیاسییەکانی پێکهێنەری حکومەت لەسەر گەڵاڵەکردن و دەرکردنی یاسایەک پەیوەست بە نەوت و غاز لە عێراق، ئاسۆیەکی ڕوون لەبەردەم ئەو یاسایە نییە و جێگری سەرۆکی لیژنەی نەوت و غازیش پێی وایە دەرچوواندنی ئەو یاسایە لەم خولە بووەتە مەحاڵ.

 

بۆچی گرنگە: یاسای نەوت و غاز یەكێكە لەو یاسایانەی کە گرنگییەکی زۆری بۆ هەرێمی كوردستان هەیە، دەرکردنی ئەو یاسایە کۆتایی بە زۆرێک لە کێشەکانی پەیوەست بە نەوت و کێشە داراییەکانی نێوان هەرێمی کوردستان و حکومەتی عێراق دەهێنێت.

 

لێدوانی فەرمی: نەهرۆ ڕواندزی، جێگری سەرۆکی لیژنەی نەوت و غاز لە پەرلەمانی عێراق بە ئاڤا نیوزی ڕاگەیاند "پڕۆژەیاسای نەوت و غاز نەگەیشتووەتە پەرلەمان و لە ئەنجوومەنی وەزیران گفتوگۆی لەسەر نەکراوە".

 

زانیاریی زیاتر: تاوەکو ئێستا پێکهاتەکان و پارێزگاکانی بەرهەمهێنەری نەوت و هەرێمی کوردستان نەگەیشتوونەتە کۆدەنگی لەسەر ڕەشنووسێک، بۆیە بابەتی پەسندکردن و تێپەڕاندنی یاساکە لەو خولە و تەنانەت خولی داهاتووی پەرلەمان مەحاڵ دەبێت و تەنانەت لەنێو ئەنجوومەنی وەزیرانیش پەسند ناکرێت تاوەکو بنێردرێتە پەرلەمان.

 

هۆکارە زانراوەکان: نەهرۆ ڕواندزی ئاشکرای دەکات کە چەند لایەنێک و دەستێک هەن لەنێو ئەم حکومەتە، دژی ئەوەن ڕێککەوتن لەسەر هەناردەکردنەوەی نەوتی کوردستان بکرێت وەک دەرچەیەک بۆ ڕێککەوتن لەسەر داڕشتنی ڕەشنووسێک بۆ یاسای نەوت و غاز و پەسندکردنی لە ئەنجوومەنی وەزیران و ڕەوانەکردنی بۆ پەرلەمان، مەگەر بە گۆڕینی سیستمی سیاسیی لە عێراق یاسایەکی لەو جۆرە دەربکرێت.