هەڵبژاردنی ئەزموونی لە هەرێمی کوردستان دەکرێت

ئاڤا نیوز

ئەمڕۆ دووشەممە لە دەیان وێستگەی دەنگدان هەڵبژاردنی ئەزموونی لە هەرێمی کوردستان دەکرێت و ئامانج لێی ئامادەکاری و تاقیکردنەوەی ئامێرەکانە.

وێنە گەورەكە: ڕۆژی 20-10ی ئەمساڵ بۆ بەڕێوەچوونی خولی شەشەمی هەڵبژاردنی پەرلەمانی کوردستان دیاریکراوە، كۆمیسیۆنی باڵای سەربەخۆی هەڵبژاردنەكانی عێراق سەرپەرشتی پرۆسەکە دەکات.

لێدوانی فەرمی: خالد عەباس، بەڕێوەبەری ئۆفیسی دھۆکی کۆمیسیۆن بە ئاڤا نیوزی ڕاگەیاند، هەموو پێداویستییە لۆجستییەکان و ئامێرەکان گەیشتوونەتە دەستیان و ئەمڕۆ هەڵبژاردنی ئەزموونی بەڕێوەدەچێت.

زانیاریی زیاتر: ئەمڕۆ و ڕۆژی 25ـی ئەم مانگە کۆمیسیۆن لە 181 وێستگەی دەنگدانی گشتی و تایبەت هەڵبژاردنی ئەزموونی دەکات. دابەشبوونی وێستگەکان بەمشێوەیە:

هەولێر؛ 56 وێستگە
سلێمانی؛ 76 وێستگە
دهۆک؛ 43 وێستگە
هەڵەبجە، شەش وێستگە 

بۆچی گرنگە: هەڵبژاردنی ئەزموونی بۆ تاقیکردنەوەی ئامێرەکان و ناردنی ئەنجامەکانی دەنگدان لە وێستگەکانەوە بۆ ناوەند، لەگەڵ زانینی کەموکوڕییەکان بۆ ئەوەی سەرجەم کێشەکان پێشوەختە دەستنیشان و چارەسەر بکرێن.