پارتی هەڵوێستی لەبارەی دابەشکردنی پۆستەکانی کەرکووک ڕاگەیاند

ئاڤا نیوز

لەبارەی دابەشکردنی پۆستەکان و پێكهێنانی حكومەتی خۆجێیی كەركووك پارتی ڕایدەگەیێنێت، ئەوەی کراوە یاسایی نییە و گرفتی هەیە.

وێنە گەورەکە:  10ـی ئەم مانگە ئەنجوومەنی پارێزگای کەرکووک لە بەغدا بەبێ ئامادەبوونی پارتی، پێکهاتەی تورکمان و هاوپەیمانیی عەرەبی کۆبووەوە، تێیدا ڕێبوار تەها لە پشکی یەکێتی وەک پارێزگار و محەممەد حافز لە پێکهاتەی عەرەب وەک سەرۆکی ئەنجوومەنی پارێزگا هەڵبژێردران و پۆستە گرنگەکان  دابەشکران.

ڕاگەیێنراوی فەرمی: مەحموود محەممەد، گوتەبێژی پارتی دیموكراتی كوردستان دەڵێت: ئەوەی لە هۆتێل ڕەشیدی بەغدا بۆ دانانی پارێزگار و حكومەتی خۆجێیی کەرکووک بەبێ ئاگاداركردنەوەی هەموو لایەنەكان و لە غیابی نوێنەرانی توركمان و بەشێك لە عەرەب و پارتی  كراوە، یاسایی نییە، گرفتی هەیە و لەسەر ڕێگەیەكی دروست نییە". 

زانیاریی زیاتر: پارتی پێیوایە ئەوەی كراوە ناتوانێ ببێتە چارەسەرێكی دروست بۆ تێپەڕاندنی كێشە و گرفتەكانی شاری کەرکووک، مەحموود محەممەد دەشڵێت: " چارەسەركردن و نەهێشتنی كێشەكانی ئەو شارە  و ساڕێژكردنی ژان و ئازارەكانی خەڵكی كەركووك بە موزایەدات و عاتیفە و یاریی سیاسی ناكرێت". 

چارەسەرەکان: گوتەبێژی پارتی چارەسەر دەخاتەڕوو و دەڵێت: "چارەسەر ئەوەیە تاكڕەوی نەكرێت و هەوڵی پەراوێزخستنی لایەنەكان نەدرێت، هەموو لایەك بە نیازپاكییەوە لەپێناو خزمەتكردنی خەڵك لە بەڕێوەبردنی کەرکووکدا بەشدار بن".