ماستەر پلانی كارەبا بۆ 10 ساڵی داهاتوو ئامادە كرا

ئاڤا نیوز  

وەزارەتی کارەبای هەرێمی کوردستان، ماستەر پلانی کەرتی کارەبای بۆ ماوەی 10ساڵی داهاتوو ئامادە کرد. 

وێنە گەورەکە: بۆ یەکەمجارە ماستەر پلانی وەزارەتی کارەبا لە لایەن ستافێکی ئەندازیاری ناخۆیی لە بەڕێوەبەرایەتی گشتیی پلاندانانی وەزارەتی کارەبا ئامادە بکریت، تێیدا شێوازی باشترکردنی سێکتەری کارەبا بۆ گەیاندنی خزمەتگوزارییەکانی کارەبا بە هاوبەشانی خراوەتەڕوو.

لێدوانی فەرمی: یاسین حەسەن، بەڕێوەبەری پلان و لێکۆلینەوە لە بەڕێوەبەرایەتی گشتیی پلاندانانی وەزارەتی کارەبا بە ئاڤانیوزی گوت: ئەم ماستەر پلانە بۆ پێشخستنی کەرتی کارەبایە لە بواری بەرهەمهێنان، گواستنەوە و دابەشکردن.

زانیاریی زیاتر: یاسین حەسەن، گوتی: تۆڕی ڤۆلتیەبەرزی 400KV کە تەنیا لە وێستگەی سلێمانی غازی و وێستگەی سەنتەری هەولێر هەن، لەم ماستەر پلانەدا لە هەموو سەنتەرەکانی لۆدی کارەبا لە سلێمانی، دهۆک، هەریر، گۆمەسپان و گەرمیان وێستگەی دیکەی 400KV دروست بکەین و بەیەکتریان ببەستینەوە، ئەمەش وادەکات بارودۆخی کارەبا و کوالێتی کارەبا زۆر باشتر ببێت.