ڕێبوار تەها: کار بۆ ئارامی و ئەمنییەتی کەرکووک دەکەین

ئاڤا نیوز

 

پارێزگاری کەرکووک ڕایگەیاند، نامەوێ ئایندەی ڕۆڵەکانی کەرکووک وەک ئێمە بێت و لەنێو ململانێی سیاسیدابن، بۆیە داوا لە هەموو لایەنە سیاسییەکان دەکەم با پێکەوە کار بکەین لەپێناو شارەکەدا.

 

وێنە گەورەکە: دوای ڕێکەوتنی یەکێتی و بەشێکی لایەنە عەرەبییەکان ڕێبوار تەها، وەک پارێزگاری کەرکووک هەڵبژێردرا و ڕۆژی چوارشەممە 14-08-2024 سوێندی یاسایی لە دادگەی کەرکووک خوارد و پاشان گوتارێکی پێشکەش کرد.

 

لێدوانی فەرمی: ڕێبوار تەها، پارێزگاری کەرکووک ڕایگەیاند: هەموومان ناسنامەی کەرکووک هەڵدەگرین و کار بۆ ئارامی و ئەمنییەتی شارەکە و داهاتووی ڕۆڵەکانمان دەکەین، تاوەکو لەنێو ململانێی سیاسیدا نەژین.

 

زانیاریی زیاتر: ڕێبوار تەها لە درێژەی گوتەکانی ئاماژەی بەوە کرد: هەموو لایەنە سیاسییەکان مافی خۆیانە دژی دەرئەنجامی هەڵبژاردنەکان بوەستنەوە، بەڵام داوایان لێ دەکەم کە بێن و پێکەوە کار بۆ شارەکە بکەین.

 

لەلایەکی دیکەوە: لەگەڵ حکومەتی فیدراڵ لە پەیوەندی بەردەوامدا دەبین، تاوەکو زۆرترین پرۆژەی خزمەتگوزاری جێبەجێ بکەین، هاوکات لەپێناو سەقامگیری و ئاوەدانکردنەوەی کەرکووک داوای هاوکاری هەموو لایەک دەکەم. پارێزگاری کەرکووک وای گوت.