هەفتەی داهاتوو ئەنجوومەنی پارێزگای كەركووك كۆدەبێتەوە

ئاڤا نیوز  

ئەندامێكی ئەنجوومەنی پارێزگای كەركووك ڕایدەگەیێنێت، هەفتەی داهاتوو ئەنجوومەنەكە كۆدەبێتەوە.

وێنە گەورەکە: ڕۆژی 10-08-2024، لە هۆتێل ڕەشیدی بەغدا بەبێ ئامادەبوونی پارتی، پێکهاتەی تورکمان و بەشێکی هاوپەیمانیی عەرەبی، پارێزگار و سەرۆکی ئەنجوومەنی پارێزگای کەرکووک هەڵبژێردران.

چی ڕووی دا: دوای كۆبوونەوەكە، پارتی كە خاوەنی دوو كورسییە لە ئەنجوومەنەكە ڕایگەیاند: بەم شێوازەی ئێستا بەشداریی حکومەتی خۆجێیی کەرکووک ناکات، سێ ئەندامەكەی دیكەی پێكهاتەی عەرەبیش كۆبوونەوەكەیان بە نایاسایی وەسف كرد و بەرەی توركمانیش لە دادگای فیدڕاڵی سکاڵای تۆمار کرد.

لێدوانی فەرمی: پەروین فاتیح، ئەندامی فراكسیۆنی یەكێتی لە ئەنجوومەنی پارێزگای كەركووك بە ئاڤا نیوزی گوت: بەدڵنیاییەوە ئەگەر یەكشەممەی داهاتوو نەبێت، دووشەممە %100 كۆبوونەوەی ئەنجوومەنی پارێزگای كەركووك بەڕێوەدەچێت.

زانیاریی زیاتر: چاوەڕوانی سەرۆكی ئەنجوومەنەكەن كە لەڕێگەی ئەو گرووپەی كە سەرجەم ئەندامانی ئەنجوومەنەكەی تێدایە سەبارەت بە بەڕێوەچوونی كۆبوونەوەكە ئاگاداریان بكاتەوە. پەروین فاتیح وای گوت.

زانیاریی بەدەستهاتوو: لە یەكەم كۆبوونەوەی ئەنجوومەنەكە دوای هەڵبژاردنی سەرۆكی ئەنجوومەن، پێویستە سەرۆك و ئەندامانی لیژنە پەیوەندیدارەكان دەستنیشان بكرێن.