كونسوڵی نوێی ئەمریكا لە هەولێر كێیە؟

ئاڤا نیوز

ستیڤن بیتنەر وەك كونسوڵی نوێی ئەمریكا لە هەرێمی كوردستان دەستبەكار بوو، یەكێكە لە دۆستەكانی گەلی كورد و  پێشتر لە ئیسرائیل و عێراق و چەند وڵاتێکی دیکە كاری كردووە.

چیرۆکی سەرەکی: ستیڤن بیتنه‌ر دوێنێ چوارشەممە وه‌ك كونسوڵى گشتى له‌ كونسوڵخانه‌ى گشتیى ئه‌مریكا له‌ هه‌ولێر ده‌ستبه‌كاربوو. به‌ر له‌ گه‌یشتنى بۆ هه‌ولێر، بیتنه‌ر له‌ ساڵانى 2022 تاوەكو 2024 وه‌ك به‌ڕێوه‌به‌رى نووسینگه‌ى كاروبارى عێراق له‌ وه‌زاره‌تى ده‌ره‌وه‌ى ئه‌مریكا له‌ دیوانى كاروبارى ڕۆژهه‌ڵاتى نزیك كارى كردووه‌. 
 

ئەوەی پێویستە بیزانیت: بیتنه‌ر جگە لە ئینگلیزی، زمانه‌كانى عه‌ره‌بى، ئیسپانى، هۆڵه‌ندى و پۆڵه‌ندى دەزانێت، خێزانداره‌ و چوار منداڵى هه‌یه‌. بڕوانامه‌ى به‌كالۆریۆسى له‌ بوارى سیاسه‌تى نێوده‌وڵه‌تى له‌گه‌ڵ پسپۆرییه‌كى كه‌م له‌ زمانى عه‌ره‌بى له‌ زانكۆى بیرغام یۆرك به‌ده‌ستهێناوه‌. بڕوانامه‌ى ماسته‌ریشی له‌ بواری زانست له‌ كۆلێژى جه‌نگى نیشتمانى به‌ده‌ستهێناوه‌.

 

زانیاریی زیاتر: پێشتر وه‌ك ڕاوێژكارى كاروبارى سیاسى و ئابوورى له‌ باڵیۆزخانه‌ى ئه‌مریكا له‌ كۆپنهاگنی پایتەختی دانیمارك كارى كردووه‌.  ڕاوێژكارى كاروبارى ئابوورىش بووه‌ له‌ باڵیۆزخانه‌ى ئه‌مریكا له‌ ئه‌سینا.

وه‌ك جێگرى سه‌رۆكى به‌شى ئابوورى له‌ كونسوڵخانه‌ى ئه‌مریكا له‌ قودس (ئۆرشه‌لیم) كاری كردووە،  به‌شدارى له‌ دانوستانه‌كانى ڕێڕه‌وى ئابووری نێوان ئیسرائیل و فه‌ڵه‌ستین كردووه‌. هه‌روه‌ها له‌ به‌شى ئابوورى باڵیۆزخانه‌ى ئه‌مریكا له‌ سان جۆس و باڵیۆزخانه‌ى ئه‌مریكا له‌ وارشۆ كاری كردووە.

بیتنه‌ر له‌ ساڵى 2003 - 2004 له‌ پارێزگاكانى ئه‌نبار و بابل له‌ عێراق وه‌ك ڕاوێژكارى سیاسه‌تى ده‌ره‌وه‌ له‌كاتى ده‌سه‌ڵاتى كاتى هاوپه‌یمانى كارى كردووه‌.

له‌ واشنتۆن، پاڵپشتى وه‌زیرى ده‌ره‌وه‌ى كردووه‌ هه‌م وه‌ك به‌رپرسى چاودێرى له‌ سه‌نته‌رى ئۆپه‌راسیۆنه‌كانى ده‌ره‌وه‌، هه‌م به‌رپرسى ستاف بووه‌ له‌ سكرتاریه‌تى جێبه‌جێكار.

 بیتنه‌ر ئه‌ندامێكى باڵاى پیشه‌ییى كاروبارى ده‌ره‌وه‌یه‌ و هه‌ڵگرى چه‌ندین خه‌ڵاتى ڕێزلێنانى باڵا و شایسته‌یە. هه‌روه‌ها خه‌ڵاتى جه‌یمس كلیمه‌ت ده‌نى وه‌زاره‌تى ده‌ره‌وه‌ى ئه‌مریكای بەدەسهێناوە‌.