دروستکردنی "چوار بەنداوە ستراتیژییەکە" بەکوێ گەیشتووە؟

ئاڤا نیوز

هەرێمی کوردستان و عێراق لەسەر دروستکردنی چوار بەنداوی نوێ بە گوژمەی چوار تریلۆن دینار ڕێککەوتوون، بڕیاریشە پێش کۆتایی ئەمساڵ  دەست بە دروستکردنیان بکرێت.

بۆچی گرنگە: دروستکردنی ئەو چوار بەنداوە ملیۆنان مەتر سێ ئاو گلدەداتەوە و ئاسایشی ئاو بۆ هەرێمی کوردستان و عێراق دابین دەکات، جگەلەوەش کێشەی کەمی ئاوی خواردنەوەی هەندێک شار و قەزا چارەسەر دەکات، هاوکات بۆ مەبەستی کشتوکاڵیش سوودیان لێوەردەگیرێت.

لێدوانی فەرمی: غەریب ئەحمەد، ئەندامی لیژنەی کشتوکاڵ و سەرچاوەکانی ئاو لە پەرلەمانی عێراق بە ئاڤا نیوزی گوت، "لە چوارچێوەی پەسەندکردنی خشتەکانی بودجەدا، بابەتی دروستکردنی چوار بەنداو لە هەرێمی کوردستان جێگیرکراوە، ئێستا وەزارەتی سەرچاوەکانی ئاوی عێراق سەرقاڵی پرۆسەی دووبارە دیزایینکردنەوەی بەنداوەکانە".

زانیاریی زیاتر: بەنداوەکان بریتین لە (دەڵگە لە قەڵادزی، مەنداوە لە هەولێر، تەقتەق لە کۆیە و باکرمان لە ئاکرێ)، تاوەکو کۆتایی ئەمساڵیش پرۆسەی دروستکردنیان دەستپێدەکات.

وردەکاریی سێ لەو بەنداوانەی دروستدەکرێن، بەمشێوەیەیە:
 
•⁠  ⁠بەنداوی دەڵگە توانای گلدانەوەی 120 ملیۆن مەتر سێ جا ئاوی هەیە، لەسەر زێی بچووک دروست دەکرێت.
 
•⁠  ⁠بەنداوی باکرمان توانای گلدانەوەی 500 ملیۆن مەتر سێ جا ئاوی هەیە و لەسەر ڕووباری خازر دروست دەکرێت.
 
•⁠  ⁠بەنداوی مەنداوە توانای گلدانەوەی 330 ملیۆن مەتر سێ جا ئاوی هەیە و لەسەر زێی گەورە دروست دەکرێت.