دوایین زانیاری لەسەر دروستکردنی چوار بەنداوی نوێ لە هەرێمی کوردستان

ئاڤا نیوز

 

دەرخستەی ئەو چوار بەنداوەی بڕیارە لە هەرێمی کوردستان دروست بکرێن، نوێدەکرێتەوە و بۆ وەزارەتی سەرچاوەکانی ئاوی عێراق دەنێردرێن.

 

وێنە گەورەکە: حکومەتی عێراق چوار بەنداو لە پارێزگاكانی هەولێر، سلێمانی و دهۆک دروست دەکات، دیزاینەکەی 10 ساڵ پێش ئێستایە و لە پڕۆسەی نوێکردنەوە دایە بەمەیش تێچووەکەی بەرز دەبێتەوە.

 

ئەوەی پێویستە بیزانیت: ئەو چوار بەنداوەی دروست دەکرێن پێکهاتوون لە، بەنداوی باکرمان لەسەر ڕووباری خازر، بەنداوی مەنداوە لەسەر زێی گەورە، بەنداوی تەق تەق و دەڵگە لەسەر زێی بچووک دروست دەکرێن.

 

لێدوانی فەرمی: ڕەحمان خانی، بەڕێوەبەری گشتیی بەنداوەکانی هەرێمی کوردستان، بە ئاڤا نیوزی گوت: "بەگوێرەی دیزاینە نوێیەکە تێچووی دروستکردنیان چوار تریلیۆن دینارە و بە دروستکردنیان نزیکەی پێنج ملیار مەتر سێجا ئاو گل دەدرێتەوە."

 

زانیاریی زیاتر: ئەگەر حکومەتی فیدراڵیش پڕۆژەی دروستکردنی ئەو چوار بەنداوە جێبەجێ نەکات، حکومەتی هەرێمی کوردستان بودجە بۆ دروستکردنی هەردوو بەنداوی دەڵگە و مەنداوە تەرخان دەکات.
بەڕێوەبەری گشتیی بەنداوەکانی هەرێمی کوردستان وای گوت.

 

خاڵی ستراتیژی: لە هەرێمی کوردستان 21 بەنداو و 118 پۆند بۆ گل دانەوەی ئاو هەن، بەمەبەستی بەرهەمهێنانی کارەبا، ئاودێری، گەشتیاری و چەندین بواری دیکە بەکاردەهێنرێن.