دوو بەرە ناکۆکەکەی نەینەوا لەسەر پۆستەكان ڕێکدەکەون

ئاڤا نیوز

بەرەی نەینەوا لیئەهلیها، چاوەڕێی بڕیاری دادگەی ئیداری دەکات، بۆ ئەوەی لەگەڵ بەرەی نەینەوای موستەقبەل کۆببنەوە و لەسەر پۆستە ئیدارییەکانی ئەو پارێزگایە ڕێککەون.

وێنە گەورەکە: نزیکەی 50 ڕۆژە کۆبوونەوەی ئەنجوومەنی پارێزگای نەینەوا بەهۆی بایکۆتی ئەندامانی نەینەوا لیئەهلیها نەکراوە و هیچ بڕیارێک لەو پارێزگایە دەرنەچووە، ئەندامانی ئەنجوومەن ڕۆژانە دەوام دەکەن بەبێ ئەوەی هیچ چالاکییەک بکرێت.

لێدوانی فەرمی: غەیاس سوورچی، بەرپرسی ڕاگەیاندنی مەڵبەندی یەکێتیی لە نەینەوا بە ئاڤا نیوزی گوت:"هەوڵێک هەیە کە هەردوو بەرەکە دوای یەکلایی بوونەوەی کەیسی دابەشکردنی پۆستەکانی ئیدارەی نەینەوا لە دادگەی ئیداری بەغدا کۆدەبنەوە و لەسەر دابەشکردنی پۆستەکان ڕێکدەکەون."

ئەوەی پێشبینی دەکرێت: لەماوەی حەوت ڕۆژی داهاتوو، کەیسی گۆرانکارییە ئیدارییەکانی ئەنجوومەنی پارێزگای نەینەوا لە دادگەی ئیداری بەغدا یەکلایی دەکرێتەوە.