ئەنجوومەنی وەزیران لەبارەی مووچە و هەڵبژاردن کۆدەبێتەوە

ئاڤا نیوز

ئەمڕۆ چوارشەممە ئەنجوومەنی وەزیرانی هەرێمی کوردستان پرسی دواکەوتنی مووچەی مانگی حەوت و هەڵبژاردنی پەرلەمانی کوردستان و چەند بابەتێکی دیکە تاوتوێ دەکات.

وێنە گەورەکە: دوای چەند هەفتەیەک ئەمڕۆ چوارشەممە ئەنجوومەنی وەزیران بەسەرپەرشتیی سەرۆکوەزیران بارزانی کۆدەبێتەوە و چەند پرسێکی گرنگ گفتوگۆیان لەسەر دەکرێت.

لێدوانی فەرمی: پێشەوا هەورامانی، گوتەبێژی حکومەتی هەرێمی کوردستان بە ئاڤا نیوزی گوت: بەشی زۆری گفتوگۆکانی کۆبوونەوەکە لەبارەی؛ یەکخستنی ڕێکارە داراییەکان لەگەڵ حکومەتی فیدراڵ، چاودێری دارایی و دۆخی دارایی و کاری هەردوو دیوانی چاودێریی دارایی هەولێر و بەغدا لەبارەی مووچە دەبێت.

زانیاریی زیاتر: وەک پێشەوا هەورامانی باسی کرد، لە کۆبوونەوەکەدا قسە لەسەر هەڵبژاردنی پەرلەمانی کوردستان و هەماهەنگیی کۆمیسیۆنی باڵای سەربەخۆی هەڵبژاردنەکان لەگەڵ سەرۆکایەتیی هەرێم و حکومەتی هەرێمی کوردستان دەکرێت.

لەلایەکی دیکەوە: دوا بڕگەی کۆبووەنەوەکە پەیوەست دەبێت بە پێشکەشکردنی ڕاپۆرتێک لەلایەن وەزارەتی بازرگانی و  پیشەسازی، سەبارەت بە  گەنمی جووتیاران و ناردنی شایستە داراییەکانیان لەلایەن حکومەتی فیدراڵ و بەبازارکردنی بەرهەمی گەنم.