لە بەغدا گرووپە نایاساییەکان دەستیان بەسەر پارکینگی شەقامەکاندا گرتووە

ئاڤا نیوز

 

چەندین گرووپ لە دەرەوەی یاسا و حکومەت دەستیان بەسەر زۆربەی شەقام و کۆڵانە سەرەکییەکانی سەنتەری شاری بەغدا گرتووە و کردوویانە بە پارکی ئۆتۆمبێل، لەبەرامبەر وەستانی هەر ئۆتۆمبێلێکیش بڕی پێنج هەزار دینار وەردەگرن.

 

وێنە گەورەکە: بەگوێرەی ئاماری فەرمیی بەڕێوەبەرایەتیی هاتوچۆی بەغدا، نزیکەی چوار ملیۆن ئۆتۆمبێل لە شەقامەکانی بەغدای پایتەختدا هاتوچۆ دەکەن، ئەمەش بووەتە هۆی دروستبوونی جەنجاڵی.

 

لێدوانی فەرمی: محەمەد ڕوبەیعی، گوتەبێژی ئەمانەتی بەغدا بەئاڤا نیوزی گوت: "چەندین گرووپ بەشێوەیەکی هەڕەمەکی دەستیان بەسەر شەقامەکانی سەنتەری بەغدا گرتووە و کردوویانە بەپارکی وەستانی ئۆتۆمبێل. ئەم کارەی ئەو گرووپانەش لە دەرەوەی ڕێنماییەکانی ئەمانەتی بەغدایە".

 

زانیاریی زیاتر: "ئەمانەتی بەغدا بە هاوبەشی لەگەڵ فەرمانگەی پاسەوانان و شارەوانی، بە بەردەوام هەڵدەکوتێتە سەر ئەو گرووپانە و دەستگیریان دەکەن، بەڵام کەسانی دیکە شوێنیان دەگرنەوە". ڕوبەیعی وادەڵێت.