کۆنسێرتۆی کەمانچە بڵاودەکرێتەوە

ئاڤا نیوز 

هونەرمەند (زۆزگ قەرەداغی) نوێترین بەرهەمی بڵاودەکاتەوە، بڕیارە لە پلاتفۆرمە نێودەوڵەتییەکانیش بڵاوببێتەوە.

لێدوانی فەرمی: زۆزگ قەرەداغی بۆ ئاڤا نیوز گوتی: "بەرهەمەکەم کۆنسێرتۆیەکە بۆ ئامێری (کەمانچە-جۆزە) لەگەڵ ئۆرکێسترای سیمفۆنی تاران، تۆمارکردن تەواوبووە و هونەرمەندی دیاری کورد ئەردەشێر کامکار سۆڵۆی کەمانچەی لە بەرهەمەکەدا ژەنیوە، وا بڕیاریشە ئۆرکێستراکە لە چالاکییەکانیاندا بەرهەمەکەی من بژەنن و لە پلاتفۆرمە نێودەوڵەتییەکانیش بڵاوببێتەوە".

زانیاریی زیاتر: "لە داهاتوودا کارێکی دیکەی هاوبەشم لەگەڵ ئەردەشێر کامکار دەبێت بە ناوی (سویتی خەرامان) کە لە حەوت بەرهەم پێکدێت و ئاوازی ئەردەشێر کامکار و دابەشکردنی منە". زۆزگ وای گوت.

گۆشەیەكی دیكە: زۆزگ قەرەداغی ناڕازییە لە ئۆرکێستراکانی هەرێمی کوردستان و دەڵێت: "ئۆرکێستراکان بەرهەمی ئاوازدانەرە کوردەکان پشتگوێدەخەن و پێیان وایە ئەگەر بە ئاستێکی نزمیش بەرهەمێکی جیهانیی بژەنن باشترە لە بەرهەمێکی ناوخۆیی، کە ئەمە هەڵەیەکی گەورەیە".