یەکەم فێستیڤاڵی نێودەوڵەتیی فۆتۆگرافی لە کوردستان بەڕێوەدەچێت

ئاڤا نیوز 

یەکەم فێستیڤاڵی نێودەوڵەتیی فۆتۆگرافی لە کوردستان بەڕێوەدەچێت، فێستیڤاڵەکە ئەزموونێکی نێودەوڵەتییە لە بواری فۆتۆگرافی و تێیدا ئاستە باڵاکانی فۆتۆگرافی دەبینرێن.

وێنە گەورەكە: ئێوارەی 24ـی ئاب لە سەرای سلێمانی یەکەم فێستیڤاڵی نێودەوڵەتیی فۆتۆگرافی لە کوردستان بە سەرپەرشتی ناوەندی حەوت ڕەنگە بەڕێوەدەچێت.

لێدوانی فەرمی: هونەرمەندی شێوەکار بەختیار سەعید، سەرپەرشتیاری ناوەندی  حەوت ڕەنگە بە ئاڤا نیوزی گوت: "پاش سێ ساڵ بەڕێوەبردنی فێستیڤاڵی فۆتۆگرافی، بۆ ئەمساڵ بڕیارماندا فێستیڤاڵەکە بکەین بە نێودەوڵەتی و پاش ڕاگەیاندن و وەرگرتنی فۆتۆکانیش لە 19 وڵاتی جیهانەوە فۆتۆ گەیشتە دەستمان.

زانیاریی زیاتر: لیژنەی دادوەری فێستیڤاڵەکە لە سێ کەس پێکدێن و هەرسێکیان کوردن، پاش هەڵبژاردنی فۆتۆکان لە لایەن لیژنەکەوە فۆتۆی نۆ وڵات ماونەتەوە.

ئەوەی پێویستە بیزانیت: لە فێستیڤاڵەکەدا 100 فۆتۆ نمایشدەکرێن و براوەکانی یەکەم و دووەم و سێیەم، خەڵات دەکرێن، وابڕیاریش فێستیڤاڵەکە لە پاش سلێمانی لە هەولێر و بەغدادیش نمایشبکرێت.

بۆچی گرنگە: "ئەم چالاکییانە دەتوانن پەیوەندی هونەریمان لەگەڵ وڵاتانی دیکە بەهێز بکەن و ببنە هەوێنی دروستکردنی پڕۆژە و کاری هاوبەش لە داهاتوودا" بەختیار سەعید وای گوت.