پارتی بەتووندی وەڵامی یەکێتی دەداتەوە: هێشتا ئێمەتان نەناسیوە

ئاڤا نیوز

گوتەبێژی پارتی وەڵامی بەشێک لە بەرپرس و میدیاکانی یەکێتی دەداتەوە و ڕایدەگەیێنێت: "لە ڕوانگەی دۆخی باڵباڵێنی ناو خودی خۆیانەوە لە ئێمە دەڕوانن و، دژ بە مەسرور بارزانی هەڵوێستی نەیارانە و قین لە دڵانە دەنوێنن و هەواڵی چەواشەکارانە و بێبنەما بڵاودەکەنەوە".

چیرۆکی سەرەکی: لە دوێنێ ئێوارەوە ڕاگەیێنراوێک بە ناوی سەرچاوەیەک لە یەکێتی، لە میدیا فەرمییەکانی ئەو حیزبە بڵاودەکرێتەوە و تێیدا هێرشی تووند دەکرێتە سەر پارتی و سەرۆکوەزیران بارزانی، ئەمڕۆ سێشەممەش مەحموود محەممەد، گوتەبێژیی پارتی، لە ڕاگەیێنراوێکدا بەتووندی وەڵامی دایەوە.

 

ڕاگەیێنراوی فەرمی: گوتەبێژی پارتی بۆ ڕای گشتی و خەڵکی کوردستان دووپاتی دەکاتەوە: "نووسەران و هاندەرانی پشت ئەو ڕاگەیێنراوەی یەکێتی، لە ڕوانگەی دۆخی باڵباڵێنی ناو خودی خۆیانەوە، دەیانەوێت وێنای پارتیمان بکەن! پارتیمان خاوەن ڕێبازێکی ڕاست و دروست و، خاوەن ڕابەر و مەرجەعێکە کە سەرۆک مەسعود بارزانییە، هەموومان ڕێبورا و خەباتگێڕی ڕێبازی بارزانین و لە سایە و چەتری جەنابی سەرۆک بارزانیدا بۆ یەک ئامانج و یەک ڕێباز تێدەکۆشین".

قووڵتر: بە ئاماژەکردن بەوەی سەرۆکوەزیران مەسرور بارزانی کار و هەڵوێست و بۆچوون و سیاسەتەکانی لە حوکمڕانی و کاری سیاسیدا لە چوارچێوەی بەرنامە و هەڵوێستی پارتیدایە، لە ڕاگەیێنراوەکەدا جەخت کراوەتەوە: "هەر جۆرە تەجاوزێک بۆ سەر کەسێتی مەسرور بارزانی، بەلای پارتی و پارتییەکانەوە تەجاوزە بۆ سەر سەرجەم پارتییەکان و جەماوەی بەهەڵوێستی پارتی".

مەحموود محەممەد لە کۆتایی ڕاگەیێنراوەکەدا دەڵێت: "ئەوانە هێشتا پارتییان نەناسیوە و پەند لە مێژوو وەرناگرن، زۆرێک پێشتر خەونیان بەوەوە دەبینی کە پارتیش وەکو خۆیان لێبکەن، بەڵام هەروەک چۆن پێشتر ئەو خەون و خەیاڵەیان نەهاتەدی، دڵنیایان دەکەینەوە پارتی و پارتییەکان بەهێز و باوەڕبەخۆبوونەوە ئەو خەون و خەیاڵەیان جارێکی دیکە دەخەنەوە ژێر گڵ. پارتیمان بە هەموو هێز و توانا و جەماوەرەکەیەوە پشتیوانی مەسرور بارزانییە بۆ بەردەوامی جێبەجێکردنی سەرجەم ئەرکەکانی".