چاوەڕوان دەکرێت سەرۆککۆماری ئێران سەردانی هەولێر بکات

ئاڤا نیوز

چاوەڕوان دەکرێت لەمیانی سەردانەکەیدا بۆ بەغدا، مەسعود پزیشکیان، سەرۆککۆماری ئێران سەردانی هەرێمی کوردستانیش بکات.

چیرۆکی سەرەکی: بڕیارە مانگی داهاتوو مەسعود پزیشکیان بە بانگھێشتێکی فەرمی سەردانی بەغدا دەکات. بەهۆی ئەوەی لەلایەن نێچیرڤان بارزانییەوە بانگهێشتی فەرمی پێشکەش کراوە، چاوەڕوان دەکرێت سەردانی هەرێمی کوردستانیش بکات.

 

ئەوەی پێویست بیزانیت: پێشتر لەلایەن نێچیرڤان بارزانی، سەرۆکی هەرێمی کوردستان بانگهێشتنامەی فەرمی پێشکەشی ئیبراهیم ڕەئیسی، سەرۆککۆماری کۆچکردووی ئێران کرابوو، لە مەراسیمی دەستبەکاربوونی مەسعود پزیشکیانیش وەک سەرۆککۆماری نوێ،  نیچێرڤان بارزانی بانگهێشتنامەی پێشکەشی ناوبراو کرد.

لێدوانی فەرمی: فەوزی هەریری، سەرۆکی دیوانی سەرۆکایەتیی هەرێمی کوردستان بە ئاڤا نیوزی گوت: "کاتی خۆی ئیبراهیم ڕەئیسی بانگهێشتنامەکەی قبووڵ کرد، بەهەمانشێوە مەسعود پزیشکیانیش قبووڵی کردووە،  پێشبینی و چاوەڕوانیمان ئەوەیە کاتێک سەردانی بەغدا دەکات سەردانی هەولێریش بکات".

 

لەلایەکی دیکەوە: نازم دەباغ، نوێنەری حکومەتی هەرێمی کوردستان لە تاران بە ئاڤا نیوزی گوت: "هیچ سەرۆکێک میوانداری ڕەتناکاتەوە، بەڵام دەڵێن دەبێت کاتی گونجا هەبێت، هەر کاتێک لەڕووی پرۆتۆکۆڵییەوە بەرنامەیان ڕێکخست، ئەو کاتە بڕیار دەدەن بێتە عێراق، لەو چوارچێوەیەش دیار دەبێت ئایا سەردانی هەرێم دەکات یان نا؟ سەردانی بۆ هەرێم تایبەتمەندی و مانا و ناوەڕۆکی خۆی هەیە، بۆیە دەبێت هۆکارەکان دیاری بکرێن".