"حکومەتی هەرێمی کوردستان هەموو پرەنسیپەکانی تایبەت بە ئاوارەکانی جێبەجێکردووە"

ئاڤا نیوز

نووسینگەی ڕێکخەری ڕاسپاردە نێودەوڵەتییەکان لە حکومەتی هەرێمی کوردستان، بە هەماهەنگی لەگەڵ رێکخراوی نێودەوڵەتی بۆ کۆچ (IOM) کۆنفرانسێکی تایبەت بە ئاوارەی ناوخۆیی و مافەکانی مرۆڤ سازکرد.

وێنە گەورەکە: ڕۆژی 31ی تەممووزی ئەمساڵ وەکو دوا وادە بۆ داخستنی کەمپەکان لەلایەن حکومەتی عێراقەوە دیاریکرابوو و بەشێکی زۆری ئاوارەکان بە زۆرەمڵی گەڕانەوە زێدی خۆیان، حکومەتی هەرێمی کوردستانیش دەیەوێت ئاوارەکان بە ویستی خۆیان بگەڕێنەوە و باروودۆخی ئەمنی و خزمەتگوزاری ناوچەکانییان ڕەچاوبکرێت. 

لێدوانی فەرمی: دیندار زێباری،ڕێکخەری ڕاسپاردە نێودەوڵەتییەکانی حکومەتی هەرێمی کوردستان بە ئاڤا نیوزی گوت: "هەرێمی کوردستان هەموو پرەنسیپە نێودەوڵەتییەکانی تایبەت بە ئاوارەکانی جێبەجێکردووە و دەبێت بە وردی بیر لە بابەتی گەڕانەوەی ئاوارەکان بکرێت". 

زانیاریی زیاتر: بە گوتەی دیندار زێباری "حکومەتی هەرێمی کوردستان ڕەتینەکردووەتەوە کە ئاوارەکان بگەڕێنەوە زێدی خۆیان، بەڵکو  لەگەڵ ئەوەدایە گەڕانەوەیان بە هۆشیاری بێت و پێداویستییە سەرەکییەکانییان بۆ دابین بکرێت، هەروەها دڵنیابن لە پاراستنی ژیانییان پێش گەڕانەوەیان".