پارتی بۆ بەغدا: مووچە و بودجە چیتر دوانەخرێن و لەکاتی خۆیاندا بنێردرێن

ئاڤا نیوز

 

بە سەرپەرشتی سەرۆک بارزانی، کۆمیتەی ناوەندی پارتی دیموکراتی کوردستان بەڕێوەچوو، گفتوگۆی چوار تەوەر کراوە، كۆبوونەوە جەختی كردەوە" گەل و نیشتمان لە پێشتر و پیرۆزترن لە جیاوازیەکانمان".

ڕاگەیێنراوی فەرمی: تەواوی پەیوەندییەکانمان لە خزمەت ڕەواندنەوەی مەترسیەکان و هەوڵدانە بۆ دابینکردنی ئاسایش و دوورخستنەوەی دەرهاویشتە خراپەکانی ئەو ئاڵۆزیانەیە لە هەرێمی کوردستان دەخەینەگەڕ، مووچەی فەرمانبەران و بودجەی هەرێمی کوردستان، چەندین ڕێککەوتنیان لەسەر کراوە، بەڵام لەلایەن حکومەتی فیدراڵی عێراق وەکو پێویست جێبەجێ ناکرێن، لەمڕەوەو هانی حکومەتی فیدڕاڵی دەدەین بۆ بەخەمەوە بوونی ئەو بابەتە و چیتر مووچە دوا نەخرێت.

لە لایەكی دیكەوە: ڕەوشی ئاسایشی هەرێمی کوردستان تەوەرێکی باسەکان بووە، پارتی پێی وایە کاری بەیەکەوەیی هەرێمی کوردستان بەرەو ئاوەدانی زیاتر دەبات و خۆڕاگری بەرامبەر ئاڵنگارییەکان و پیلانی ناحەزان بەهێزتر دەبێت. ئەوەش هاتووە "هەرێمی کوردستان هەڵبژاردنی لەپێشە لە هەموو کات پێویستترە لە سەر بنەمای پاراستنی بەرژەوەندییە باڵاکان و دەستکەوت و مافەکانی گەلەکەمان و، پاراستنی دامودەزگا شەرعیەکان و قەوارەی هەرێمی کوردستان یەک هەڵوێست و تەبابین".

زانیاریی زیاتر:"بۆ پاراستنی دامودەزگا شەرعیەکان و قەوارەی هەرێمی کوردستان یەک هەڵوێست و تەبابین، کەلێن دروستنەکرێت کە لێیەوە ناحەزان و دژ بە مافەکانمان سوود وەربگرن و زیان بە هەرێمی کوردستان بگات. جیاوازیەکانمان نابێ لەسەر حیسابی قەوارەی هەرێم و دەسەڵاتە دەستووریەکانی و ماف و بژێوی ژیانی خەڵکی هەرێم بشکێتەوە، گەل و نیشتمان لە پێشتر و پیرۆزترن لە جیاوازیەکانمان".ڕاگەیێنراوەكە وادەڵێت.

ئەوەی پێویستە بیزانیت: لە تەوەری چوارەمی کۆبوونەوەکە گفتوگۆ لەبارەی دامەزراوە شەرعیەکانی هەرێمی کوردستان کراوە، "لە ڕوانگەی ئەوەی کە ئەم دامەزراوانە لە ئاکامی خەبات و تێکۆشانی خەڵکی کوردستان و بەرگری و خۆڕاگری پێشمەرگە قارەمانەکان و خوێنی شەهیدان و پشتیوانی جەماوەری کۆڵنەدەری کوردستان بەدی هاتوون، هەروەها ئەم دامەزراوانە وەکو میکانیزمی هێشتنەوەی قەوارەی هەرێمی کوردستانن بە یەک پارچەیی، کۆبوونەوە پشتیوانی خۆی بۆ سەرۆکایەتی هەرێم و حکومەتی هەرێم دووپات دەکاتەوە، پشتیوانی هەنگاوەکانیان دەکات بۆ چارەسەرکردنی کێشە و گرفتەکان، هەروەها بۆ هەڵبژاردنی خولی شەشەمی پەرلەمانی کوردستان".