یەکەم قۆناغی سەرژمێری گشتیی دانیشتووان لە عێراق دەستپێدەکات

ئاڤا نیوز

 

ئەمڕۆ یەکشەممە بە بەشداری 30 هەزار فەرمانبەر پرۆسەی ژمارەدانان لە ماڵ و باڵەخانەکان وەک یەکەم قۆناغی سەرژمێریی لە عێراق دەستیپێکرد و دوو مانگ دەخایەنێت.

 

ڕاگەیێنراوی فەرمی: وەزارەتی پلاندانانی عێراق بڵاویکردەوە، بۆ ئەنجامدانی یەکەمین قۆناغی سەرژمێری کە ماوەی 60 ڕۆژ دەخایەنێت، زیاتر لە 30 هەزار فەرمانبەر ڕاهێنانیان پێکراوە و ئەمڕۆ دەستبەکار بوون.

 

لەلایەکی دیکە: عەبدولزەهرە هینداوی، گوتەبێژی وەزارەتی پلاندانانی عێراق بە ئاڤا نیوزی گوت، لەم قۆناغەدا سێ پرسی گرنگی سەرژمێری دیاریدەکرێن، ئەوانیش بریتین لە ژمارەدانان لەسەر ماڵ و باڵەخانەکان، دیاریکردنی سنووری جوگرافی هەر ناوچەیەکی دانیشتووان و تۆمارکردنی تۆماری خێزانەکان.

 

بۆچی گرنگە: لەم قۆناغەی سەرژمێرییدا هەر گوند و گەڕەک و ناوچەیەک بەسەر چەند بلۆکێکی بچوکدا دابەشدەکرێن و ئەو لیژنەیەش دیاری دەکرێت کە سەرپەرشتی سەرژمێری دەکات تیایاندا، هەروەها ژمارەدانان لەسەر ماڵ و باڵەخانەکانیش پرۆسەکە ئاسانتر دەکات و لیژنەکان لەو ماوەیەدا کۆی ژمارەی خێزانەکان و ئەو کارمەند و کۆمپانیا و باڵەخانانە تۆمار دەکەن کە دەکەونە ناو سنورێکی دیاریکراوەوە.

 

باکگراوند: سەرژمێریی گشتی لە 20-11-2024 لە تەواوی عێراق دەکرێت. دوایین سەرژمێری لە عێراق بەبێ پارێزگاکانی هەرێمی کوردستان لە ساڵی 1997 کراوە، لەو کاتەوە ئەمە یەکەمین سەرژمێرییە بکرێت.