سەرۆکوەزیران بارزانی: مانگی داهاتوو 200 هەزار فەرمانبەر بە هەژماری من مووچە وەردەگرن

 ئاڤا نیوز

 

سەرۆکوەزیران بارزانی ڕایگەیاند پڕۆسەی بە دیجیتاڵیکردنی سیستەمی بانکیی لەگەشەسەندندایە، چیتر هەزاران فەرمانبەرانی حکومەت ناچار نین بۆ وەرگرتنی مووچەکانیان چەند کاتژمێرێك نۆرە بگرن.

وێنە گەورەکە: بە دیجیتاڵیکردنی مووچە و کاروبارەکانی حکومەت، وەک یەكێک لە ستراتیژییەکانی کابینەی نۆیەمی حکومەتی هەرێمی کوردستان سەیر دەکرێت، چاکسازی لە سیستەمی بانکی لەپێناو بوونیادنانی ژێرخانێکی دیجیتاڵی بەهێز کراوە، ئێستا هاووڵاتیان بەشێکی کارەکانیان لەگەڵ حکومەت لەڕێگەی ئۆنلاین دەکەن.

لێدوانی فەرمی: سەرۆکوەزیران بارزانی، لە میانەی پێشکەشکردنی گوتارێک لە کاتی کردنەوەی پێشانگەی هایتێکس لە هەولێر گوتی: "پڕۆسەی بە دیجیتاڵیکردنی سیستەمی بانکی لەگەشە سەندندایە و چیتر هەزاران فەرمانبەرانی حکومەت ناچار نین بۆ وەرگرتنی مووچەکانیان چەند کاتژمێر نۆرە بگرن، مانگی داهاتوو 200 هەزار فەرمانبەر لە ڕێگەی هەژماری من مووچە وەردەگرن."

گۆشەیەکی دیکە: لەماوەی کابینەوەی نۆیەمدا نیو ملیۆن کارمەندی کەرتی گشتی هێنراونەتە نێو سیستەمی بانکیی و سەرۆکوەزیران بارزانی جەخت لەوە دەکاتەوە ساڵی داهاتوو چەند دەستپێشخەرییەكی دیکە ڕادەگەێینرێت کە وەچەرخانێک دەبێت بۆ وەبەرهێنەران و بازرگانان، جگە لەوەش  یەک ملیۆن و نیو ناسنامەی دیجیتاڵی کە لەماوەی ئەو کابینەیەدا دەرچوون، ساڵی داهاتوو دابەشدەکرێن.