لە بەغدا هێزە ئەمنییەکان بە شەق و دار کەوتنە گیانی خۆپێشاندەران

ئاڤا نیوز 

 

دەرچووانی پیشە تەندروستییەکان لە بەغدا خۆپیشاندانیان کرد و داوای دامەزراندنیان کرد، بەڵام لەلایەن هێزە ئەمنییەکانەوە تووندوتیژیان بەرامبەر بەکارهێنراو بە دەیان خۆپیشاندەر برینداربوون.

 

وێنە گەورەکە: لە کۆی 57 هەزار دەرچووی پیشە پزیشکی و تەندروستییەکان، فەرمانی دامەزراندن بۆ 29 هەزاریان دەرچووە، ئەمڕۆش لە بەغدا بە هەزاران کەس لەو دەرچووانەی کە دانەمەزراون لە ناوچەی سەوزی بەغدا چوونە بەردەم وەزارەتی پلاندانان.

 

چی ڕوویدا: دەرچووانی پیشە پزیشکی و تەندروستییەکان بە ڕێپێوان بەشێوەیەکی ئاشتیانە چوونە بەردەم وەزارەتی پلاندان لە ناوچەی سەوزی بەغدا، بەڵام لەلایەن هێزە ئەمنییەکانەوە تووندوتیژیان لە بەرامبەر بەکارهێنراو بە دەیان خۆپیشاندەر برینداربوون.

 

لێدوانی فەرمی: مستەفا سەنەد، ئەندامی پەرلەمانی عێراق لە پەیامێکی ڤیدیۆییدا لە نزیک خۆپیشاندەرانەوە ڕایگەیاند: هەوڵدان بۆ ڕاگرتنی خۆپیشاندانەکان بەمشێوەیە کارێکی دروست نییە، ڕۆڵەکانمان ڕووبەڕووی گوشار و لێدان و سووکایەتیکردن بکرێنەوە کە ئەمە لەگەڵ ئەو دروشمان یەک ناگرێتەوە کە حکومەت بەرزی کردووەتەوە.

 

لەلایەکی دیکە: سەندیکای پیشە تەندروستییەکان لە ڕاگەیێنراوێکدا ئاماژە بۆ ئەوە دەکات، ئەوەی ئەمڕۆ بەرامبەر بە ئەندامەکانمان و دەرچووەکانمان کراوە جێگەی قبووڵ کردن نییە و بە تووندی سەرکۆنەی دەکەین، هاوکات هەموو بەرپرسیارێتییەک دەخەینە ئەستۆی دەزگا ئەمنییەکان لەوەی بەرامبەر بە ئەندامانمان و کوڕ و کچەکانمان کراوە.