وەزیری پێشووتری دارایی عێراق ڕەخنە لە سیستەمی ئابووری جیهان دەگرێت

ئاڤا نیوز 

 

وەزیری پێشووی دارایی عێراق، وەک شارەزایەکی ئابووری پەرتووکێکی لەبارەی شکستی بانکی جیهانی و سندووقی نەختینەی نێودەوڵەتی بلاوکردەوە، کە بە درێژایی 80 ساڵی دامەزرانی تاوەکو ئێستا نەیتوانییوە هەژاری کۆنترۆڵ بکات و نزیکەی 60 ٪ـی دانیشتووانی جیهان لە ژێر هێڵی هەژارین. 

 

چیرۆکی سەرەکی: عەلی عەلاوی وەزیری پێشووی دارایی عێراق لەچاوپێکەوتنێکدا لەگەڵ رۆژنامەی زە نەشیۆناڵ ئەنجامیداوە، تێیدا باسی نوێترین پەرتووکی بە ناوی 'جیهانی دەوڵەمەند و جیهانی هەژار' کردووە، پەرتووکەکە لە بارەی هەوڵ و شکستەکان بۆ کۆنترۆڵکردنی هەژاری لەسەر ئاستی جیهان دەکات. 

 

وێنە گەورەکە: عەلاوی لە پەرتووکەکەی ئاماژەی بەوەداوە، "ئەگەر سەیری مێژووی وڵاتە تازە گەشەسەندووەکان بکەین، هەندێک نەخش و تەوەری دیاریکراو دەبینێت، کە تەنیا لە بەشێکی کەمی وڵاتان هەیە و توانیوانە بەسەر هەژاری زاڵ بن. لە کاتێکدا ئەو وڵاتانە بە تەواوی خۆیان لە هێڵی بیرکردنەوەی ئابووریناسە رۆژئاواییەکان بە دوورگرتووە. 

 

لە گۆشەیەکی دیکەوە: عەلی عەلاوی لە پەرتووکەکەیدا بە یادگارییەکانی سەردەمی منداڵییەوە دەستی پێکردووە، دواتر گەشتکردنی بەرەو ئەوروپا لە پەنجاکانی سەدەی رابردوو. هەروەها باس لە جەنگ و نەهامەتییەکانی عێراق دەکات، کە هەمیشە لە دواوەی شانۆ و چێشتخانە و هۆتێل و باڵاخانە بەرزەکانی بەغدا شتێک هەبووە، ئەویش هەژاری بوو لە هەموو کوچە و کۆڵانێکی بڵاوبوو. 

 

ئەوەی لە بارەیەوە دەگوترێت: ئێستا عەلی عەلاوی وەک وەزیری پێشووی دارایی عێراق و کارکردن لە بانکی جیهانی خاوەن پاشخانێکی دەوڵەمەندی زانیارییە و لە لەندەن ژیان بەسەر دەبات. لە کافێیەکی دڵخوازی خۆی دادەنیشێت و لەگەڵ هاوڕێ و هاوکارانی رابردووی و کەسانی دیپلۆماسی کۆدەبێتەوە.

 

ئەوەی پێویستە بیزانیت: لەسەردەمی عەلی عەلاوی وەزیری پێشووی دارایی عێراق گەورەترین دزی سەدە ئەنجامدرا. کە 2.5 ملیار دۆلار لە ئەماناتی باج دزرا و تاوەکو ئێستا ئەو دۆسیەیە یەکلا نەکراوەتەوە؛ چەندین بەرپرس و بازرگان لەو دۆسیەیە تێوەگلاون، لە دیارترینیان نور زوهێرە.