کارگەی زۆم بەرهەمی ناوخۆیی شیرەمەنی هەناردەی دەرەوەی وڵات دەکات

ئاڤا نیوز

 

کارگەیەکی شیرەمەنی لە هەرێمی کوردستان، توانیویەتی پلەی یەکەم لەسەر ئاستی عێراق بەدەستبهێنێت، لە ئایندەیەکی نزیکیشدا پلانی هەناردەکردنی بەرهەمەکانی بۆ دەرەوەی وڵات هەیە.

 

لێدوانی فەرمی: شەهزاد عەزیز عیسا، بەڕێوەبەری کاڕگێڕی کارگەی زۆم بۆ بەرھەمھێنانی شیرەمەنی لە ھەرێمی کوردستان بە ئاڤا نیوزی ڕاگەیاند: "توانیومانە لە ساڵێکدا پلەی یەکەم لەسەر ئاستی عێراق بەدەست بهێنن و سێ بڕوانامەی نێودەوڵەتیش لە بوارەکانی سەلامەتیی خۆراک و سەلامەتیی پیشەیی و سیستمی بەڕێوەبردنی کوالێتیدا وەربگرین".

 

زانیاریی زیاتر: لە دووەمین کۆنگرەی نیشتمانی عێراق INTF بە پاڵپشتیی یەکێتی ئەوروپا و بەشداریی 400 کۆمپانیای عێراق، کارگەی زۆم توانیویەتی خەڵاتی باشترین بەرهەم لەسەر ئاستی عێراق بەدەست بهێنێت.

 

ژمارەکان وا دەڵێن: کارگەکە لە ساڵی 2023 خاوەنی 12 بنکەی کۆکردنەوەی شیر بوو، بەڵام لە ساڵی 2024 ئەم ژمارەیە زیادی کردووە بۆ 26 بنکەی وەرگرتن و پلانی زیادکردنی بنکەکانیش هەیە، هەروەها ساڵی ڕابردوو تەنیا 572 ئاژەڵدار شیریان بۆ کارگەی زۆم هێناوە، بەڵام ئێستا زیاتر لە دوو هەزار جووتیار شیر بۆ کارگەکە دەهێنن.

 

ئەوەی پێویستە بیزانیت: لە ساڵی 2023 بەرزترین ڕێژەی وەرگرتنی شیر لە یەک ڕۆژدا 9 هەزار و 148 کیلۆ بووە، بەڵام ئێستا بەرزترین ڕێژەی وەرگرتن لە یەک ڕۆژدا 39 هەزار و 500 کیلۆ بووە.

 

باکگراوند: کارگەکە لە ڕێکەوتی 30-05-2023 لە دەڤەری بارزان و گوندی ژاژۆکی سەر بە قەزای مێرگەسۆر کرایەوە و تاوەکو ئێستا هەلی کاری بۆ زیاتر لە 250 ڕەخساندووە، ئەو بەرهەمانەشی لە کارگەکە هەن ئەمانەن: "ماست و ماستاو و پەنیر و قەیماخ و شیر"