سەرۆکوەزیران بارزانی: هەولێر تاوەکو 30 ساڵی دیکە کێشەی ئاوی نامێنێت

ئاڤا نیوز

 

سەرۆکوەزیران بارزانی لە میانی دانانی بەردی بناغەی پڕۆژەی ئاو لە هەولێر ڕایگەیاند، چیدیکە خەڵک هەولێر خەمی کەمئاوی نابێت و تاوەکو 30 ساڵی دیکە هەولێر کێشەی ئاوی نابێت. 

 

وێنە گەورەکە: پڕۆژەی فریاگوزاری خێرای گەیاندنی ئاو بۆ شاری هەولێر لە ناحیەی کەورگۆسک لەسەر زێی گەورە بە گوژمەی نزیکە 480  ملیۆن دۆلار جێبەجێ دەکرێت، لە یەک کاتژمێردا 20 هەزار مەتر سێجا ئاو دەپاڵێوێت، کە ڕۆژانە دەکاتە 480 هەزار مەتر سێجا، بەمەش گرفتی کەمئاوی %60ـی دانیشتووانی هەولێر چارەسەر دەکات.

 

لێدوانی فەرمی: سەرۆکوەزیران بارزانی لە کاتی کردنەوەی پڕۆژەکە گوتارێکی پێشکەش کرد و ڕایگەیاند، "ئەم پڕۆژەیە کە تاوەکو 30 ساڵی دیکە کێشەی کەمئاوی هەولێر چارەسەر دەکات، هاوکات هەوڵدەدەین پڕۆژەیەکی دیکەی ئاو لە سنووری قوشتەپە و گوندەکانی دەورووبەری جێبەجێ بکەین، بە تەواوبوونی ئەو دوو پڕۆژەیەش سەدان بیر دادەخەین و ئاوی ژێر زەوی دەبووژێتەوە".

 

زانیاریی زیاتر: هەندێک لایەن هەوڵیاندا دەیان ساڵەی خەڵک بکەن بە کەرستەی بانگەشەی و ململانیێی سیاسی، لەکاتێکدا کێشەی کەمئاوی هەولێر بە چەند تانکەرێک چارەسەر ناکرێت، بەڵکو پێویستی بە جێبەجێکردنی پڕۆژەی لەم شێوەیە هەیە. سەرۆکوەزیران بارزانی وای گوت.

 

لەلایەکی دیکەوە: لە بەشێکی گوتارەکەیدا، سەرۆکوەزیران بارزانی تیشکی خستەسەر ئەوەی، کە پڕۆژەی ریسایکلینی ئاو لە هەولێر جێبەجێ دەکرێت، ڕیسایکلینی ئەو ئاوە دەکات کە لە هەولێر دەردەچێت، بە جۆرەش ڕێگە لە پیسبوونی ژینگە و ئاوی ژێر زەوی دەگرین و ئاوەکەش بۆ ئاودانی سەوزایی شارەکە بەکار دەهێنرێتەوە.