لە هەولێر لیستی مووچەی مانگی هەشت ڕادەستی تەیف سامی دەکرێت

ئاڤا نیوز

لە کۆبوونەوەی ئەمڕۆی وەزارەتەکانی دارایی هەرێمی کوردستان و عێراق لیستی مووچەی مانگی هەشت ڕادەستی تەیف سامی، وەزیری دارایی عێراق دەکرێت.

 

وێنە گەورەکە: دوو ڕۆژە ئەنجوومەنی وەزاری عێراق بۆ ئابووری لە هەولێرە و زنجیرەیەک کۆبوونەوەیان لەگەڵ ئەنجوومەنی ئابووریی هەرێمی کوردستان کردووە، ئامانجی هاتنی ئەنجوومەنەکە چارەسەرکردنی پرسە هەڵپەسێردراوەکانی نێوانیانە بەتایبەت پرسە دارایی و ئابوورییەکان، هەردوولاش بەئەرێنی باسی گەیشتن بە چارەسەر دەکەن.

 

زانیاریی بەدەستهاتوو: سەرچاوەیەک لە وەزارەتی دارایی و ئابووریی هەرێمی کوردستان بە ئاڤا نیوزی ڕاگەیاند: بڕیاردراوە ئەمڕۆ لە کۆبوونەوەی هەردوو وەزارەتی دارایی هەرێمی کوردستان و عێراق لیستی مووچەی مانگی هەشتی فەرمانبەران ڕادەستی وەزارەتی دارایی عێراق بکرێت.

 

بۆچی گرنگە: تەیف سامی، وەزیری دارایی عێراق و ئاوات شێخ جەناب، وەزیری دارایی و ئابووریی هەرێمی کوردستان لە کۆبوونەوەکەدا بەشدار دەبن و ڕاشکاوانە قسە لەسەر گرفتەکانی لیستی مووچە دەکرێت. یەکەمجاریشە لە هەولێرەوە لیستی مووچە ڕادەستی وەزارەتی دارایی عێراق دەکرێت.

 

ئەوەی پێویستە بیزانیت: سەرەتای مانگی نۆ مووچەی مانگی حەوتی مووچەخۆرانی هەرێمی کوردستان دابەش کرا، چاوەڕوان دەکرێت دوای ڕادەستکردنی لیستەکەش لە ئایندەیەکی نزیکدا مووچەی مانگی هەشت لەلایەن بەغداوە ڕەوانە بکرێت.