زانیاری لەبارەی ناوەڕۆکی کۆبوونەوەی چوارچێوەی هەماهەنگی

ئاڤا نیوز 

 

چوارچێوەی هەماهەنگی بۆ گفتوگۆکردن لەسەر دوایین ڕێککەوتنی ئەمنیی نێوان بەغدا و ئەنقەرە کۆدەبێتەوە، سەرچاوەیەکیش دەڵێت، سەرکردەکانی چوارچێوەی هەماهەنگیی لەژێر فشاردان بۆ ئەوەی "دژی دەستدرێژییەکانی تورکیا" هەڵوێستێکی فەرمی ڕابگەیەنن.

 

وێنە گەورەکە: لە بەرواری 8-15، عێراق و تورکیا یاداشتێکی لێکتێگەیشتنیان واژۆکرد و بەگوێرەی ناوەڕۆکەکەی تورکیا ڕازییبووە هێزەکانی لە عێراق بکشێنێتەوە، بەڵام 23ی هەمان مانگ سەرۆکایەتی کۆماری تورکیا بڵاویکردەوە، هێزەکانیان لە عێراق ناکشێننەوە و ئۆپەراسیۆنەکانیش دژی پەکەکە بەردەوام دەبن.

 

زانیاریی بەدەستهاتوو: سەرچاوەیەکی سیاسی ئاگەدار لە کۆبوونەوەکە بە ئاڤا نیوزی ڕاگەیاند: لە کۆبوونەوەی سەرکردەکانی چوارچێوەی هەماهەنگیی کە بە ئامادەبوونی ڕاوێژکاری ئاسایشی نیشتیمانی عێراق و سەرۆکی دەستەی حەشدی شەعبی لە ماڵی هادی عامری ئەمینداری ڕێکخراوی بەدر بەڕێوەدەچێت، باس لە دوایین ڕێککەوتنی ئەمنیی نێوان بەغدا و ئەنقەرە دەکرێت بەتایبەت ئەو پابەندیی و ئەرکانەی کەوتووەتە سەر هەردوولا لەدوای واژکردنی ڕێککەوتنەکە.

 

زانیاریی زیاتر: "دوای کۆبوونەوەکە سەرکردەکانی چوارچێوەی هەماهەنگیی هەڵوێستی فەرمییان لەسەر ئەو ڕێککەوتنە دەبێت کە ڕەنگدانەوەی هەڵوێستی حکومەتیشە، بەتایبەتی کە تورکیا بەردەوامە لە دەستدرێژییەکانی بۆسەر خاکی عێراق، ئەوەش فشاریی جەماوەری دروستکردووە و وایکردووە دژی ئەو سیاسەتەی تورکیا جوڵە و هەڵوێستی پێویست بخرێتەڕوو".