كۆتایی ئەم هەفتەیە پزیشكیان سەردانی هەرێمی كوردستان دەكات

ئاڤا نیوز

 

بڕیارە سبەی مەسعود پزیشكیان، سەرۆككۆماری ئێران سەردانی بەغدای پایتەختی عێراق بكات و كۆتایی ئەم هەفتەیەش بگاتە هەرێمی كوردستان.

 

وێنە گەورەكە: لەسەر بانگهێشتی محەممەد شیاع سوودانی، سەرۆكوەزیرانی عێراق، سبەی چوارشەممە مەسعود پزیشكیان، سەرۆككۆماری ئێران سەردانی عێراق دەكات و بڕیارە دواتر سەردانی هەرێمی كوردستانیش بكات.

 

زانیاریی بەدەستهاتوو: بەپێی زانیارییەكان، وێستگەی سەرەتای سەردانەكەی پزیشكیان بەغدایە و ژمارەیەك كۆبوونەوە لەگەڵ بەرپرسانی باڵای عێراق دەكات و لەوچوارچێوەیەشدا چەند یاداشتێكی گرنگ لەنێوان عێراق و ئێران واژوو دەكرێت.

 

زانیاریی تایبەت: دوای بەغدا، سەرۆككۆماری ئێران دەچێتە باشووری عێراق بەتایبەت شاری نەجەف، لەوێ مەزارگە ئایینییەكان بەسەردەكاتەوە ، بۆ ڕۆژی دواتر سەردانی هەولێری پایتەختی هەرێمی كوردستان دەكات و لەگەڵ سەرۆك بارزانی و سەرۆكوەزیران بارزانی و سەرۆكی هەرێمی كوردستان كۆدەبێتەوە و هەمان ڕۆژ دەگەڕێتەوە ئێران.

 

لێدوانی فەرمی: فوئاد حوسێن، وەزیری دەرەوەی عێراق بە کوردستان حەسەن، پەیامنێری دیپلۆماسیی ئاڤای ڕاگەیاند: مەسعود پزیشکیان، سەرۆککۆماری ئێران لەمیانەی سەردانەکەی بۆ عێراق، دوای بەغدا سەردانی هەولێریش دەکات، ئێستاش پەیوەندییەکانی نێوان عێراق و ئێران زۆر پتەو و باشە.

 

ئەوەش بزانە: ئەمە یەكەم سەردانی پزیشكیانە بۆ دەرەوەی ئێران، یەكەم وێستگەش عێراق و هەرێمی كوردستانە و پاشان سەردانی ژمارەیەك وڵاتی دیكە دەكات،هاوكات لە ڕۆژانی داهاتوو بەشداری لە کۆبوونەوەی کۆمەڵەی گشتیی نەتەوە یەکگرتووەکان لە ئەمریكا دەكات.