ئەنجوومەنی وەزیران ئەنجامی کۆبوونەوەی هەولێر و بەغدا تاوتوێ دەکات

ئاڤا نیوز 

 

بە سەرپەرشتیی سەرۆکوەزیران بارزانی، ئەنجوومەنی وەزیرانی هەرێمی کوردستان کۆدەبێتەوە، هەنگاوەکانی جێبەجێکردنی بڕیار و ڕاسپاردەکانی کۆبوونەوەی ئەنجوومەنی وەزاریی عێراق بۆ کاروباری ئابووری و ئەنجوومەنی ئابووریی هەرێمی کوردستان تاوتوێ دەکات.

 

وێنە گەورەکە: ڕۆژانی 8 و 9 ی ئەم مانگە، بە سەرپەرشتیی سەرۆکوەزیران بارزانی، زنجیرەیەک کۆبوونەوە لەنێوان هەردوو ئەنجوومەنی وەزاریی عێراق بۆ ئابووری و ئەنجوومەنی ئابووریی هەرێمی کوردستان لە شاری هەولێر بەڕێوەچوون، چەند ڕێککەوتنێک کران و چەند ڕاسپاردەیەکیش ئاراستەی حکومەتی عێراق کران، دوێنێی سێشەممەش ئەنجوومەنی وەزیرانی عێراق ڕاسپاردەکان و ناوەڕۆکی ڕێککەوتنەکانی تاوتوێ کرد، کە گرنگترینیان پرسی مووچە و بڕیاری لەبارەوە درا.

 

زانیاریی بەدەستهاتوو: کۆبوونەوەی ئەمڕۆ چوارشەممە 11-09-2024ـی ئەنجوومەنی وەزیرانی هەرێمی کوردستان، هەڵوەستە لەسەر هەنگاوەکانی جێبەجێکردنی بڕیار و ڕاسپاردەکانی کۆبوونەوە ئابوورییەکان دەکرێت.

 

باکگراوند: دوێنێ سێشەممە ئەنجوومەنی وەزیرانی عێراق لەدوای کۆبوونەوەی هەفتانەی ڕایگەیاند: ناردنی مووچەی فەرمانبەرانی هەرێمی کوردستان تاوەکو کۆتایی ئەمساڵ بەردەوام دەبێت، هەروەها وەزارەتی دارایی عێراق بەردەوام دەبێت لە خەرجکردنی مووچەی فەرمانبەرانی هەرێمی کوردستان کە مووچەکانیان ڕاگیرابوو بەهۆی نەبوونی ژمارەی وەزیفی.