زانیاریی نوێ دەربارەی هێرشکردنە سەر دوو چەکدارەکەی داعش لە کەرکووک

ئاڤا نیوز 

 

یەکێک لەو چەکدارانەی کە ئەمڕۆ لە ڕووبەڕوو بوونەوەی هێزە ئەمنییەکانی کەرکووک لە گوندی سێکانیان دەستگیرکراوە، سێ ڕۆژ لەمەوبەر لە ئەمریکاوە گەڕاوەتەوە.

 

چیرۆکی سەرەکی: بەیانی ئەمڕۆ چوارشەممە 11-09-2024، لە گوندی سێکانیانی سنووری پارێزگای کەرکووک، ڕووبەڕووبوونەوە چەکداری لە نێوان هێزی ئەمنی هاوبەش و دوو چەکداری داعش ڕوویدا، بەهۆیەوە چەکدارێک کوژرا و یەکێکی دیکەیان ڕایکردووە، هەروەها سێ کارمەندی هێزە ئەمنییەکان بریندار بوون.

 

وێنە گەورەکە: بەرەبەیانی ئەمڕۆ هێزێکی هاوبەش کە پێکهاتبوو لە دەزگای ئاسایشی نیشتمانی و پۆلیسی خۆجێیی و دەزگای بەرەنگاربوونەوەی تیرۆر لە سلێمانی، ئۆپەراسیۆنێکی پێشوەختەیان کرد لە گوندی 'سێکانیان' لە باکووری شاری کەرکووک، بۆ دەستگیرکردنی چەند تیرۆرستێک، لە ڕووبەڕووبوونەوەکە دوو ئەفسەر و کارمەندێکی هێزە ئەمنییەکان برینداربوون کە برینی یەکێکیان سەختە.

 

زانیاریی بەدەستهاتوو: ڕۆکان مەحموود، پەیامنێری ئاڤا میدیا لە کەرکووک ڕایگەیاند: " ئەو چەکدارەی کوژراوە تەمەنی 17 ساڵە، ئەوەشی دەستگیکراوە زاوایانە و  بەشێک نەبووە لە ڕووبەڕووبوونەوەکە، تەنیا لە ماڵەکە لەگەڵیان بووە". بەڵام دەزگای ئاسایشی نیشتمانیی عێراق دەڵێت دوای گەمارۆدان چەکدارەکە خۆی کوشتووە.

 

لەلایەکی دیکەوە: ئاسایشی نیشتمانیی عێراق چەند زانیارییەکی پێشوەختەی بڵاوکردووەتەوە و ئاماژە بەوەدەدات: ئەو چەکدارانە داعش بوون و پلانی کردنی چەند کردەوەیەکی تیرۆرستیان لە پارێزگای کەرکووک داڕشتووە.