سەرۆک بارزانی دوو تێبینی لەسەر دەقی شانۆگەری داستانی کوردستان هەیە

ئاڤا نیوز

 

سەرۆک بارزانی دوای بینینی نمایشی شانۆگەری داستانی کوردستان گوتی، کارێکی زۆر نایابە، بەڵام دوو تێبینی لەسەر شانۆگەرییەکە خستەڕوو کە یەكێکیان پەیوەندی بە بەکارهێنانی جۆرێک لە چەک بوو لە نمایشەکە.

 

وێنە گەورەکە: ئەمڕۆ چوارشەممە 11-09-2024، بە ئامادەبوونی سەرۆک بارزانی؛ شانۆیەکی میوزیکاڵیی بە ناوی داستانی کوردستان بە بەشداری 80 ئەکتەر نمایشکرا، کە مێژووی پێنج هەزار ساڵەی کورد وێنا دەکات.

 

لێدوانی فەرمی: سەرۆک بارزانی دوای نمایشەکە ڕایگەیاند: "دوو تێبینیم لەسەر شانۆگەرییەکە هەیە، یەکەم بەکارهێنانی جۆری ئەو چەکە بووە کە گوایە لەسەردەمی شۆڕش بووە و ناوەکەی بە 'لێ ئیفایڵد' دەهێنرێت، ناوەکەی ئینگلیزییە و تفەنگی 'بڕنەو' نییە، ئەمە بگۆڕن هەروەها عەیاری بڕنەوەکە 7.92 بوو نەک 303."

 

زانیاریی زیاتر: تێبینی دووەمی سەرۆک بارزانی، لەسەر بەشێکی حیوارەکە بوو کە باس لەوە دەکات، 'ئەوان لە باب و باپیرانی خۆیان فێری بێوەفایی بوون'. سەرۆک بارزانی، داوایکرد ئەو حیوارە لابدەن و باسی باب و باپیرانیان نەکەن، بەڵکو بیگۆڕن بۆ "ئەوان لە باب و باپیرانی خۆیان فێرببوو بەڵێنەکانیان بەجێبگەیێنن نەک بەڵێن شکێن بن".

 

ئەوەی پێویستە بیزانیت: پڕۆڤەی شانۆگەرییەکە 17 مانگ بەردەوام بووە، بۆ ماوەی سێ ڕۆژ لە دهۆک نمایش دەکرێت و بڕیارە لەشارەکانی دیکەی هەرێمی کوردستانیش نمایش بکرێت.