ئاڤا وادەی دەستپێکردنی بانگەشەی هەڵبژاردن ئاشکرا دەکات

ئاڤا نیوز

 

بەگوێرەی ڕێکارەکانی کۆمیسیۆن دوای پەسەندکردنی ناوی بەربژێرە نوێیەکان و تێپەڕێنی 24 کاتژمێر بەسەریدا، بانگەشەی هەڵبژاردن دەستپێدەکات.

 

وێنە گەورەکە: ڕۆژی 20-10-2024، هەڵبژاردنی گشتیی پەرلەمانی کوردستان بەڕێوەدەچێت.

 

لێدوانی فەرمی: خالید عەباس، بەرپرسی کۆمیسیۆنی باڵای سەربەخۆی هەڵبژاردنەکانی عێراق- لقی دهۆک، بە ئاڤا نیوزی گوت: "لەلایەن کۆمیسیۆنەوە دوو بەربژێر ڕەتکرانەوە، ئەو بەربژێرەی خەڵکی دهۆکە سکاڵای تۆمارکرد و دادگا لەبەرژەوەندی بەربژێرەکە بڕیاری دا و دەتوانێت بەشداری هەڵبژاردن بکات."

 

"بەربژێرە ڕەتکراوەکەی هەولێریش سکاڵای تۆمار کردووە، بڕیارە ڕۆژی سێشەممەی داهاتوو سکاڵاکەی لە دەستەی دادوەریی عێراق یەکلایی بکرێتەوە."

 

ئەوەی پێویستە  بیزانیت: دوای یەکلاکردنەوەی سکاڵاکە، کۆمیسیۆن سێ ڕۆژ بەو حیزبە دەدات، تاوەکو بەربژێری جێگرەوە دیاری بکات، ئەگەر ئەو هەنگاوە نەگرێتەبەر مافی دەسوتێت.

 

زانیاریی بەدەستهاتوو: 24 کاتژمێر دوای پەسەندکردنی ناوی بەربژێرەکان بانگەشەی هەڵبژاردن دەستپێدەکات.

 

لەلایەکی دیکەوە: بڕیاربوو ڕۆژی 16-9-2024 بانگەشەی هەڵبژاردن دەستپێبکات، بەڵام بەهۆی ڕەتکردنەوەی ناوی چەند بەربژێرێک لەلایەن کۆمیسیۆنەوە بانگەشە دواخرا.