وەزیری کشتوکاڵ: لە کابینەی نۆ 10 بەنداو دروست کراوە

ئاڤا نیوز

 

لە کاتی دانانی بەردی بناغەی بەنداوی دوین وەزیری کشتوکاڵ ڕایگەیاند، لە کابینەی نۆیەم بایەخی سەرەکی دروستکردنی بەنداو و پاراستنی سامانی ئاو بووە.

 

وێنە گەورەکە: بە ئامادەبوونی سەرۆکوەزیران مەسرور بارزانی، بەردی بناغەی بەنداوێکی دیکەی ستراتیژی دانرا و تەنیا لە تەمەنی ئەم کابینەیە، بە نزیکی هێندەی هەشت کابینەی ڕابردوو بەنداو دروست کراوە.

 

لێدوانی فەرمی: بێگەرد تاڵەبانی، وەزیری کشتوکاڵ و سەرچاوەکانی ئاو دەڵێت: لە هەشت کابینەی ڕابردوودا تەنیا 14 بەنداو تەواو کرابوون کە توانای گلدانەوەی 50 ملیۆن مەتر سێجا ئاویان هەبوو، بەڵام تا کۆتایی تەمەنی ئەم کابینەیە 10 بەنداو تەواو دەبێت و توانای گلدانەوەی 160 ملیۆن مەتر سێجا ئاویان دەبێت، ئێستا هەرێمی کوردستان خاوەنی 10 ملیار و 122 ملیۆن مەتر سێجا ئاوە.

 

بۆچی گرنگە: بێگەرد تاڵەبانی دەڵێت: دروستکردنی ئەم بەنداوە لەڕووی مێژووییەوە بایەخی زۆری هەیە، چونکە قەڵای میرنشینی سۆران بووە، لەڕووی گەشتیاریش نزیکە لە شەقڵاوە و بۆ سامانی ماسی ناوچەکە گرنگی هەیە.

 

ئەوەی پێویستە بیزانیت: بەنداوی دوین، بەرزیەکەی 75 مەترە و درێژیەکەی 320 مەترە، توانای گلدانەوەی 100 ملیۆن مەتر سێجا ئاوی هەیە.