زیاتر لە دوو هەزار عومرەکاری کورد لە سعودیە تووشی کێشە دەبن

ئاڤا نیوز

 

دوو هەزار و 400 عومرەكاری كورد كە دەبوو دوو ڕۆژ پێش ئێستا بگەڕێینەوە هەرێمی كوردستان، لە وڵاتی سعوودیە گیردەخۆن، هۆكارەكەش هێڵی ئاسمانیی عێراقە.

 

چیرۆكی سەرەكی: دوو ڕۆژە هێڵی ئاسمانیی عێراق، گەشتە ئاسمانییەكانی بۆ سعوودیە ڕاگرتووە و تاوەكو ئێستا هۆكارەكەی ڕوون نییە.

 

لێدوانی فەرمی: ئەرشەد محەممەد، عومرەكارێكی كوردە لە وڵاتی سعوودیەوە بە ئاڤا نیوزی ڕاگەیاند: ئێمە زیاتر لە 2400 عومرەكاری كوردین و لەڕێگەی هێڵی ئاسمانیی عێراقەوە گەشتمان كردووە، دەبوو دوو ڕۆژ پێش ئێستا بگەڕێینەوە هەرێمی كوردستان، بەڵام پێمان دەڵێن فڕۆكە نییە و هێڵی ئاسمانی عێراق گەشتەكانی بۆ سعوودیە ڕاگرتووە.

 

قووڵتر: عومرەكارەكان لەڕێگەی چەند كۆمپانیایەكی فڕۆكەوانییەوە گەشتیان كردووە و فڕۆكەكان هی هێڵی ئاسمانیی عێراقن، زیاتر لە دوو ڕۆژە گەشتەكانی بۆ سعوودیە ڕاگرتووە، جگە لە دوو هەزار و 400  عومرەكاری كورد، ژمارەیەكی زۆر عومرەكاری عەرەبی عێراقیش بەهۆی وەستانی گەشتەكانەوە ئێستا لە سعوودیە گیریان خواردووە، كۆمپانیاكان بە عومرەكارەكانیان ڕاگەیاندووە، تاوەكو 15 ڕۆژی دیكە فڕۆكە نییە.

 

بۆچوونی لایه‌نی به‌رامبه‌ر: مەریوان شێرزاد، بەڕێوەبەری كۆمپانیای زەوار مەكە لە شاری هەولێر بە ئاڤا نیوزی ڕاگەیاند: هۆكاری ڕاگرتنەكە ئێمە نین، بەڵكوو هێڵی ئاسمانی عێراقە، لەدوێنێوە گەشتە ئاسمانییەكانی بۆ سعوودیە ڕاگرتووە، دوێنێ دوا گەشت كرا و تاوەكو ئێستا دەستی پێنەكردووەتەوە.

 

زانیاریی زیاتر: بەپێی گوتەی مەریوان شێرزاد، ڕاگرتنەکە دوو تا سێ ڕۆژ دەخایەنێت و گەشتەكان دەستپێدەكەنەوە و سەرجەم عومرەكارە كوردەكانیش دەگەڕێنەوە هەرێمی كوردستان.