سەرۆکوەزیران بارزانی: بێ گوێدانە ئەملا و ئەولا خزمەتی خەڵک دەکەین

ئاڤا نیوز 

 

سەرۆکوەزیران مەسرور بارزانی، لەمیانی دانانی بەردی بناغەی 15 قوتابخانە و باخچەی ساوایان لە سنووری هەولێر ڕایگەیاند: ئەوەی لە بەرژەوەندیی خەڵکی کوردستان بێت بێ گوێدانە ئەملا و ئەولا جێبەجێی دەکەین.

وێنە گەورەکە: حکومەتی هەرێمی کوردستان گرنگییەکی تایبەت بە کەرتی پەروەردە دەدات، بەشێوەیەک تەنیا لە کابینەی نۆدا  194 باڵەخانەی نوێ دروستکراون و هەزار و 670 قوتابخانەش نۆژنکراونەتەوە.

 

لێدوانی فەرمی: مەراسیمی دانانی بەردی بناغەی پرۆژەکان لە قەزای خەبات دانرا، سەرۆکوەزیران مەسرور بارزانی گوتارێکی پێشکەش کرد و ڕایگەیاند، "ئەوەی لە بەرژەوەندی هاووڵاتییانی هەرێمی کوردستان بێت بێ گوێدانە قسەی ئەملا و ئەولا جێبەجێی دەکەین، سەرەڕای هەموو قەیرانەکان گرنگی تایبەتمان بە کەرتی پەروەردە داوە و وەبەرهێنانی بەردەواممان تێدا کردووە."

 

لەلایەکی دیکەوە: سەرۆکوەزیران تیشکی خستەسەر ئەوەی هەڵبژاردنی قەزای خەبات بۆ دانانی بەردی بناغەی پرۆژەکان، ئاماژەیە بۆ گرنگی ئەو دەڤەرە بۆ حکومەت، مژدەی پڕۆژەی نوێ و گرنگی دیکەی بە دانیشتووانی قەزاکە دا و گوتی، "ئەم دەڤەرە شایستەی خزمەتی زیاترە، پلان و پڕۆژەمان بۆ ئەم دەڤەرە هەیە."