لەسەرتاسەری عێراق فۆرمی خۆراک بە ئەلیکترۆنی دەکرێت

ئاڤا نیوز

 

بڕیارە فۆرمی خۆراک لە سەرانسەری عێراق بە ئەلیکترۆنی بکرێت، ئەمەش بووەتە هۆی ئەوەی ڕێکارەکانی تۆمارکردنی ناوی منداڵی تازە لەدایکبوو لە فۆرمەکە ڕابگیرێت.

 

وێنە گەورەکە: وەزارەتی بازرگانیی عێراق زیاتر لە یەک ساڵ و نیوە تۆمارکردنی ناوی تازەی لە دایکبووانی ڕاگرتووە، بە بیانوی ئەوەی سیستمی زیادکردنی ناوی لە دایکبووان مێژووەکەی کۆنە و بۆ ساڵی 1996 دەگەڕێتەوە. لەئێستادا سیستمەکە نوێدەکرێتەوە و دەکرێتە ئەلیکترۆنی، بۆیە ناوی ئەو منداڵانەی تازە لە دایک دەبن لە فۆرمی خۆراک زیاد ناکرێت.

 

لێدوانی فەرمی: سیامەند قادر نانەكەلی، بەڕێوەبەری ڕێكخستنی پسووڵەی خۆراكی هەولێر، بە ئاڤا نیوزی ڕاگەیاند: نەک تەنیا لە هەرێمی کوردستان، بەڵکو ماوەی یەک ساڵ و نیوە لە تەواوی عێراق زیاکردنی ناوی منداڵان لە فۆرمی خۆراک ڕاگیراوە.

 

زانیاریی زیاتر: بڕیارە فۆڕمی خۆراک بکرێتە ئەلیکترۆنی، ئەو کاتە هاووڵاتییان دەتوانن لە ماڵەوە لە ڕێگەی بەڵگەنامەکانەوە ناوی منداڵ زیاد بکەن یان ناوی مردوو بسڕنەوە.

 

زانیاریی بە دەستهاتوو: زیاتر لە پێنج ملیۆن هاونیشتمانیی لە هەرێمی کوردستان مانگانە بەشەخۆراک وەردەگرن، بڕیارە تا کۆتایی ئەمساڵ تۆمارنەکردنی ناوی منداڵانی تازە لە دایکبوو بۆ فۆڕمی خۆراک بەردەوامی هەبێت، منداڵیش کە ناوی تۆمار دەکرێت، تا یەک ساڵی تەمەنی تەواو نەکات هیچ بەشە خۆراکی پێنادرێت، دوای ئەوە وەک کەسێکی گەورە مافی دەبێت لە وەرگرتنی بەشە خۆراکی مانگانە.