هێزەکانی ئەمریکا بە تەواوی لە عێراق ناکشێنەوە

ئاڤا نیوز 

 

سەرۆکی لیژنەی ئاسایش و بەرگری لە پەرلەمانی عێراق، ئەمریکا بە دواخستنی کشانەوەی هێزەکانی لە عێراق تۆمەتبار دەکات.

 

لێدوانی فەرمی: بەدر کەریم محەممەد، سەرۆکی لیژنەی ئاسایش و بەرگری پەرلەمانی عێراق ڕایگەیاند: پێشتر پەرلەمان دەنگیداوە بە کشانەوەی هێزەکانی ئەمریکا لە عێراق، بەڵام ئەمریکا تا ئێستا نیاز پاکی نەنواندووە، سەرەڕای ڕێککەوتنی نێوان هەردوو وڵات سەبارەت بە کشانەوەی سەرجەم هێزەکانی ئەمریکا لەعێراق تا ساڵی 2025.

 

لەلایەکی دیکەوە: ڕۆژنامەی وۆڵ ستریت جۆرناڵ لە زاری بەرپرسانی ئەمریکییەوە ئەوەی بڵاوکردووەتەوە: گفتوگۆکانی نێوان واشنتن و بەغدا بۆ کەمکردنەوەی ژمارەی سەربازانی ئەمریکا لە عێراق لە قۆناغەکانی کۆتاییدایە، تا ساڵی 2026 هێزەکانی ئەو وڵاتە لە عێراق بە چەند قۆناغێک دەکشێنەوە، لە قۆناغی یەکەمیشدا ئەمریکا لە سەرەتای ساڵی 2025 ژمارەیەک سەرباز لە عێراق دەکشێنێتەوە. 

 

ئه‌وه‌ی پێویسته‌ بیزانیت: لیژنەیەکی باڵای سەربازیی لە نێوان عێراق و هاوپەیمانیی نێودەوڵەتی دژ بە داعش بە سەرۆکایەتیی ئەمریکا، بۆ پێداچوونەوە بە ئەرکی سەربازیی هاوپەیمانان پێکهێنراوە و تاوەکو ئێستا چەندین کۆبوونەوەیان کردووە