پێنج مانگە دەنگ بە یاسایەک دراوە و جێبەجێ ناکرێت

ئاڤا نیوز

 

وێڕای ئەوەی یاسای هەمواركراوی چاودێریی كۆمەڵایەتی و خاوەن پێداویستی تایبەت دوای ئەوەی پەرلەمان دەنگی لەسەر دا، دواتر لە 3-6-2024 لە ڕۆژنامەی وەقایعی عێراقی بڵاوکرایەوە، بەڵام تائێستا هیچ بڕگەیەكی ئەو یاسایە نەچووەتە بواری جێبەجێکردنەوە.

 

چیڕۆكه‌ سه‌ره‌كییه‌كه‌: پەرلەمانی عێراق ڕۆژی 15-4-2024 دەنگی لەسەر یاسای هەموارکراوی چاودێریی كۆمەڵایەتی و خاوەن پێداویستی تایبەت دا، گرنگترین بڕگەکانی یاساکە زیادکردنی مووچەی ئەو توێژەیە لە 170 هەزار دینارەوە بۆ 250 هەزار دینار.

 

لێدوانی فەرمی: عەممار موسا، بەڕێوەبەری گشتیی بەشی چاکسازی لە دەستەی مافی خاوەن پێداویستییە تایبەتەکان لە وەزارەتی کار و کاروباری کۆمەڵایەتی عێراق بەئاڤا نیوزی ڕاگەیاند: بەهۆی تەرخاننەکردنی بودجەی پێویست لەلایەن وەزارەتی داراییەوە تا ئێستا پڕۆژە یاساکە نەچووەتە بواری جێبەجێکردنەوە، لە ئەگەری جێبەجێکردنیدا بە شێوەیەکی پاشەکشەیی سەرجەم مووچەکانیان بەیەکەوە بۆ خەرج دەکرێت.

 

له‌لایه‌كی دیكه‌وه: وەزارەتی كار و كاروباری كۆمەڵایەتیی هەرێمی کوردستان، داوا لە ئەنجوومەنی ئابووری عێراق دەکات ناوی نزیكەی 17 هەزار خاوەن پێداویستی تایبەت تۆماربکرێت کەپێشتر تۆمارنەکراون، بۆئەوەی هاوشێوەی هاوتاكانیان لە عێراق مووچەی چاودێریی كۆمەڵایەتی بیانگرێتەوە.

 

ئەمەش بزانە: لەهەمواری یاساکەدا تەمەنی چاودێریی کۆمەڵایەتی لە 18 ساڵەوە بۆ 15 ساڵ کەمکرایەوە، هاوکات چاودێریی کۆمەڵایەتی و خاوەن پێداویستی تایبەت بۆیان هەیە مووچەیەکی دیکە وەربگرن، جگە لەمووچەکەی وەزارەتی کار و کاروباری کۆمەڵایەتی .