لە عێراق حەوت تۆمەتبار بە تۆمەتی گەندەڵی و مامەڵەکردن بە ماددەی هۆشبەر دەستگیر کران

ئاڤا نیوز

 

دادگە سزای زیندانیکردنی هەتا هەتایی بۆ پێنج تۆمەتباری ماددە هۆشبەرەکان دەرکرد و هاوکات دوو فەرمانبەر بەهۆی وەرگرتنی بەرتیل بە پێنج ساڵ زیندانیکردن سزا دران. 

 

وێنە گەورەکە: گەندەڵی و ماددەی هۆشبەر لە عێراق بوونەتە دیاردە و ڕۆژانە بە تۆمەتی گەندەڵیکردن لە دامودەزگاکانی حکومەتی عێراق و بازرگانی و بەکارهێنانی ماددەی هۆشبەر و کارتێکەرە دەروونییەکان خەڵک دەستگیر دەکرێن.

 

ڕاگەیێنراوی فەرمی: ناوەندی میدیایی ئەنجوومەنی باڵای دادوەریی عێراق ڕایگەیاند: هێزە ئەمنییەکانی عێراق لە چەند ئۆپەراسیۆنێکدا پێنج تۆمەتباریان لە شوێنی جۆراوجۆر بە 22 کیلۆگرام ماددەی هۆشبەرەوە دەستگیر کرد.

 

گۆشەیەکی دیکەی دیمەنەکە: دوو فەرمانبەری فەرمانگەیەکی حکومەت بەهۆی وەرگرتنی بەرتیل لە ئافرەتێکی سکاڵاکار لەگەڵ کچەکەیدا بە پێنج ساڵ زیندانیکردن سزا دران کە لە بەرامبەر بەڵێنی دامەزراندنیان پارەیان لێ وەرگرتوون.

 

ئەوەی پێویستە بیزانیت: لە ماوەی سێ ساڵی ڕابردوودا وەزارەتی ناوخۆی عێراق، 43 هەزار بازرگان و بەکارهێنەری ماددە هۆشبەرەکانی دەستگیر کردووە و لەنێویشیاندا 27 تۆڕی نێودەوڵەتیی بازرگانیی ئەو ماددانە دەستگیرکراون.