وەزارەتی شارەوانی نۆ ڕێنمایی بۆ بانگەشە دیاری دەکات

ئاڤا نیوز

وەزارەتی شارەوانی لەپێناو  پاکوخاوێن ڕاگرتنی ژینگە و جوانی شارەکان لەکاتی بانگەشەی هەڵبژاردندا نۆ ڕێنمایی بۆ حیزب و بەربژێران دیاری دەکات

وێنە گەورەکە: لە چواچێوەی ئامادەکارییەکان بۆ بەڕێوەچوونی هەڵبژاردنی پەرلەمانی کوردستان کە بڕیارە 20ی مانگی داهاتوو بکرێت، حکومەتی هەرێمی کوردستان و لایەنە پەیوەندیدارەکان چەندین ڕێکاری ئەمنی و خزمەتگوزارییان گرتووەتەبەر.

ڕاگەیێنراوی فەرمی: وەزارەتی شارەوانی لە چوارچێوەی گرنگیدان بە ژینگە و پاکوخاوێن ڕاگرتنی سەوزایی و شەقامەکان داوا لە حیزب و بەربژێران دەدات بەم ڕێنماییانە پابەندبن:

1-ڕێگە نادرێت پۆستەری حیزب و کاندیدەکان لەسەر ستوون و دیوارەکان بە بزمار و لەزگە و ماددەی لکێنەر هەڵبوواسرێت.

2- ڕێگە نادرێت بە دانانی وێنە و پۆستەر لەسەر سەوزایی و دوورگەی ناوەندی و ناو پاركە گشتییەكان بە هەر جۆرە كەرەستەیەك.

3- ڕێگە نادرێت بە بەكارهێنانی قوم، لم، چیمەنتۆ و بلۆك بۆ ڕاگرتنی تابلۆ و كەرەستەكانی تری بانگەشە.

4- ڕێگە نادرێت بە هەڵواسینی وێنە و پۆستەرەكان لەسەر هێمای هاتووچۆ و تابلۆ ڕێنیشاندەرەكان یاخود هەڵواسین لە شوێنی سووڕانەوەكانی ئۆتۆمبێل كە ببێتە هۆی دروستبوونی ڕووداوی هاتووچۆ.

5- ڕێگە نادرێت شوێنەوار و شوێنە كولتوورییەكان بۆ هیچ جۆرە بانگەشەیەك و هەڵواسینێك بەهیچ جۆرە ماددەیەك بەكاربهێنرێت.

6- ڕێگە نادرێت بە هەڵواسینی وێنە و پۆستەری كاندیدانی حیزب و كاندیدانی لایەنە سیاسییەكان لەسەر دیوار و شوورای فەرمانگەكانی حكومەت و شوێنە گشتییەكان وەك: مزگەوت، نەخۆشخانە، زانكۆ، قوتابخانە و...هتد.

7- هەر شارەوانییەك بەپێی تایبەتمەندیی دەڤەری خۆی، سەرباری ئەم خاڵانە، دەتوانێت ڕێكاری تایبەت بە خۆی بۆ بەرژەوەندیی موڵكی گشتی و پاراستنی پاكوخاوێنی شار دەربكات.

8- لەدوای تەواوبوونی بانگەشە، هەر بەربژێرێك بەرپرسیارە لە لێكردنەوەی وێنە و تابلۆكان و پاككردنەوەی شوێنەكە.

9- ئەگەر بەربژێرێك پابەند نەبێت بە ڕێنماییەكان، ئەوە پۆستەر و بانگەشەكەی لەلایەن تیمەكانی شارەوانی لادەبرێت و كاردانەوەی یاسایی لەگەڵ دەكرێت.