هێرشەکانی ئیسرائیل بۆ سەر لوبنان 274 کوژراوی لێکەوتەوە

ئاڤا نیوز

 

سوپای ئیسرائیل هۆشداریی دایە دانیشتووانی باشووری لوبنان تا لە بارەگاکانی حیزبوڵڵا و ئەو باڵەخانانەی کە حیزبوڵڵا وەک کۆگا بەکاریان دێنێت دوور بکەونەوە، چونکە ئیسرائیل بە ئامانجیان دەگرێت.

 

وێنە گەورەکە: وەزیری بەرگریی ئیسرائیل ئامانجی هێرشەکانی بۆ سەر باشووری لوبنان ڕوونکردەوە، بەوەی دەیانەوێت حیزبوڵڵا لاواز بکەن، تا ئاستێک کە نەتوانێت ببێتە هەڕەشە بۆ سەر ئارامیی باکووری ئیسرائیل و ئاوارە ئیسرائیلییەکانیش بۆ شوێنەکانی خۆیان بگەڕێنەوە. 

 

لێدوانی فەرمی: یۆئاڤ گالانت، وەزیری بەرگریی ئیسرائیل ڕایگەیاند: "ئێمە هێرشەکانمان لە لوبنان قووڵتر دەکەینەوە، لێکەوتەی ئۆپەراسیۆنەکان بەردەوام دەبێت و تا بەدەستهێنانی ئامانجەکانمان بەردەوام دەبین، ئەمەش بۆ گەڕانەوەی دانیشتووانی باکوور بە سەلامەتی بۆ ماڵەکانیان."

 

کاریگەریی و لێکەوتەکان: دوای ڕاگەیێنراوەکەی وەزیری بەرگریی، سوپای ئیسرائیل 800 پێگەی حیزبوڵڵا لە باشووری ئەو وڵاتە بۆردومان کرد.

 

لەلایەکی دیکەوە: وەزارەتی تەندرووستیی لوبنان ئاماری قوربانیانی هێرشەکانی ئیسرائیلی بڵاوکردەوە و ڕایگەیاند، لانیکەم 274 کەس کوژراون و زیاتر لە 1000 کەسیش بریندار بوون. 

 

زانیاریی زیاتر: دوای بوردومانەکانی ئیسرائیل، حکومەتی لوبنان کۆبوونەوەیەکی خێرای لەسەر دۆخەکە ئەنجام دا؛ هێرشەکانی ئیسرائیلی بە 'پلانی وێرانکەر' ناو برد و سەرکۆنەی کردن.

 

ئەوەش بزانە: حیزبوڵڵای لوبنان چەند پێگەیەکیان لە ئیسرائیل کردووەتە ئامانج کە لە ناویاندا دامەزراوەیەکی بەرهەمهێنانی سەربازی هەیە.

 

قوڵتر: گرژییەکانی ئەم چەند ڕۆژەی ڕابردووی نێوان ئیسرائیل و حیزبوڵڵا ئومێدەکانی گەیشتن بە ئاگربەستی غەززە و چارەسەریی کێشەکانی ناوچەکەیان ئەستەمتر کردووە.