وەزارەتی سامانە سروشتییەکان: 10 ملیۆن لیتر نەوتمان دابەشکردووە

ئاڤا نیوز

 

وەزارەتی سامانە سروشتییەکان دواین ئاماری دابەشکردنی نەوتی سپی لە پارێزگاکانی هەرێمی کوردستان بڵاوکردەوە، بەگوێرەی داتاکان زیاتر لە 10 ملیۆن لیتر دابەشکراوە.

 

وێنە گەورەکە: ساڵانە بەر لە دەستپێکی وەرزی سەرما، وەزارەتی سامانە سروشتییەکان بەنرخی پاڵپشتیکراو، نەوت بەسەر هاونیشتمانیان دابەش دەکات.

 

ڕاگەیێنراوی فەرمی: ئەمڕۆ دووشەممە، وەزارەتی سامانە سروشتییەکان ڕایگەیاند، تا دوێنێ ڕێژەی 7%ی نەوت دابەشکراوە، زۆرترین ڕێژەی دابەشکردنیش لە پارێزگای هەڵەبجە بووە، بەپێی داتاکان 52 هەزار و 257 خێزان لە دابەشکردنی نەوتی سپی سوودمەند بوون و هێشتا زیاتر لە ملیۆنێک و 391 هەزار خێزان ماون نەوت وەربگرن.

 

ژمارەکان وادەڵێن: لە هەرێمی کوردستان یەک ملیۆن و 443 هەزار و 553 خێزان لای وەزارەتی سامانە سروشتییەکان ناویان تۆمارکراوە بۆ سوودمەند بوون لە وەرگرتنی نەوت، ئەو ژمارەیە پێویستیان بە زیاتر لە 268 ملیۆن لیتر نەوت هەیە.

 

باکگراوند: ڕۆژی 11-9-2024 وەزارەتی سامانە سروشتییەکان ڕایگەیاند، پرۆسەی دابەشکردنی نەوتی سپی ماڵان بەنرخی پاڵپشتیکراو دەستیپێکردووە، هەر بەرمیلێکی بە 100 هەزار دینارە و چوار هەزار دیناریش کرێی گواستنەوەیە.