حیزبوڵڵای لوبنان هێرشی پێچەوانە دەکاتە سەر ئیسرائیل

ئاڤا نیوز

 

حیزبوڵڵای لوبنان لە ڕێگەی دەیان مووشەکەوە چەند ناوچەیەک لە ئیسرائیل دەکاتە ئامانج و گوتەبێژی سوپای ئیسرائیلیش دەڵێ لە کاتژمێرەکانی ڕابردوو چاودێریی هەڵدانی 65 مووشەکمان لە لوبنانەوە کردووە.

 

وێنە گەوەرەکە: گرژیی و ناکۆکییەکانی نێوان سوپای ئیسرائیل و حیزبوڵڵای لوبنان لە هەڵکشانی بەردەوامدایە و سوپای ئیسرائیل لە چەند ڕۆژی ڕابردوو بە دەیان پێگەی حیزبوڵڵای لە خاکی لوبنان کردووەتە ئامانج، لە بەرامبەریشدا حیزبوڵڵا هێرشی پێچەوانە دەکاتە سەر ئیسرائیل.

 

چی ڕوودەدات: سوپای ئیسرائیل بەردەوامە لە بە ئامانجگرتنی سەرکردە و ئەندامانی حیزبوڵڵا لە لوبنان، لە هەفتەی ڕابردووەوە ژمارەیەک سەرکردەی ئەو حیزبەی کردووەتە ئامانج کە دیارترینیان ئیبراهیم عەقیل بوو.

 

لێدوانی فەرمی: دانیاڵ هاگاری، گوتەبێژی سوپای ئیسرائیل ڕایگەیاند: لە ماوەی کاتژمێرەکانی ڕابردوو چاودێریی هەڵدانی 65 مووشەکمان لە خاکی لوبنانەوە کردووە.

 

لە لایەکی دیکەوە: بەپێی میدیاکانی ئیسرائیل، دوای بۆردومانی ناوچەکانی باشووری بەیروت، 105 مووشەک ئاراستەی ناوچەکانی باکووری ئیسرائیل کراون.

 

ئەوەی پێویستە بیزانیت: لە هەفتەی یەکەمی جەنگی نێوان ئیسرائیل و حیزبوڵڵای لوبنان 558 هاووڵاتیی لوبنان گیانیان لەدەستداوە و هەزار و 835 کەسیش برینداربوون، لەوانە 50 منداڵ و 94 ئافرەتی تێدایە.