ڕێكکاری تووندتر بۆ ڕاگرتنی سەرپێچی بەنزینخانەكان دەگیرێتەبەر

ئاڤا نیوز 

 

وەزارەتی سامانە سروشتییەكانی هەرێمی كوردستان پێداچوونەوە بە سەرپێچیی بەنزینخانەكان دەكات و ڕێكکاری تووندتر بۆ كۆنتڕۆڵكردنی سەرپێچی و كوالێتی و بڕی پێویستی بازاڕ دەگرێتەبەر.

 

ڕاگەیێنراوی فەرمی: وەزارەتی سامانە سروشتییەكان ڕایگەیاند: سزای سەرپێچیی بەنزینخانەكان ڕێكدەخرێتەوە، بۆ ئەم مەبەستەش لیژنەی بەدواداچوون لەسەرجەم پارێزگا و ئیدارە سەربەخۆكان پێكدەهێنرێت.

 

وێنە گەورەكە: ڕۆژی چوارشەممە 25-09-2024 لیژنەی ئامادەكردن و پێداچوونەوە بە ڕێنمایی سزای بەنزینخانەكان بەسەرپەرشتی فەلاح مەولوود، بەڕێوەبەری گشتیی وەبەرهێنانی كانزایی و ئەندامانی لیژنەكە لەسەر ئاستی وەزارەتی سامانە سروشتییەكان و پارێزگا و ئیدارە سەربەخۆكان بۆ ئامادەكردنی ڕێنمایی یەكگرتوو بۆ كۆنتڕۆڵكردنی سەرپێچیی بەنزینخانەكان كۆبوونەوە.

 

بۆچی گرنگە: كۆبوونەوەی بەرپرسانی باڵای وەزارەتی سامانە سروشتییەكان لەپێناو ئەوەیە، بەرهەمی سووتەمەنی لە وێستگەكانی فرۆشتن لە پارێزگا و ئیدارە سەربەخۆكان بەپێی كوالێتیی دیاریكراو و پێداویستی بازاڕ بێت.

 

ئەوەی پێویستە بیزانیت: لە ماوەی ڕابردوودا لیژنەكانی بەدواداچوونی نرخ و كوالێتیی بەنزین، بەهۆی فرۆشتنی بەنزینی كوالێتی خراپ و پابەندنەبوون بە نرخی دیاریكراوی بەنزین، چەندین بەنزینخانەیان بە پێبژاردن و داخستن سزادا.