عێراق پێشوازی لە دەیان برینداری لوبنانی دەکات

ئاڤا نیوز

 

ئێوارەی ڕۆژی چوارشەممە نەخۆشخانەکانی عێراق پێشوازییان لە دەیان برینداری لوبنانی کرد کە بەهۆی شەڕ و پێکدادانی نێوان سوپای ئیسرائیل و حیزبوڵڵای لوبنانی لە خاکی لوبنان بریندار ببوون.

 

وێنە گەورەکە: بەهۆی فراوانبوونی شەڕی ئیسرائیل و حیزبوڵڵای لوبنان بەپێی دوایین ئامارەکانی وەزارەتی تەندروستیی لوبنان زیاتر لە 558 کوژراو و هەزار و 835 بریندار هەن.

 

زانیاریی بەدەستهاتوو: سەرچاوەیەکی ئاگادار لە فڕۆکەخانەی نێودەوڵەتیی بەغدا بە میدیای عێراقی ڕاگەیاند: کاتژمێر 9ی ئەمشەو نزیکەی 50 بۆ 70 بریندار لەگەڵ هاوەڵەکانیان لە لوبنانەوە گەیشتنە فڕۆکەخانەی نێودەوڵەتیی بەغدا.

 

زانیاریی زیاتر: بریندارەکان لەلایەن لیژنەیەکی تایبەت سەر بە عەتەبەی حوسەینی پێشوازییان لێکرا و گوازرانەوە نەخۆشخانەکانی سەر بە عەتەبەکان، ئاماژەی بۆ ئەوەشکرد، بڕیارە کاروانێکی دیکە لە لوبنانەوە بگەنە عێراق.

 

لەلایەکی دیکەوە: وەزارەتی کۆچ و کۆچبەرانی عێراق لە بەیاننامەیەکدا ڕایگەیاند: لەئەگەری ئاوارەبوونی هاووڵاتیانی لوبنان بەرەو عێراق، سەرجەم ڕێکارەکان ئامادەیە بۆ پێشکەشکردنی هاوکاری مرۆیی و فریاگوزاری، و ئامادەکردنی زەمینەی گونجاو بۆیان.

 

ئەوەی پێویستە بیزانیت: جگە لە بریندارەکان تەرمی زولفەقار زرغام جبووری، یەکەم هاووڵاتی کوژراوی عێراقی لە لوبنان گەڕێنرایەوە عێراق