کێشەی مووچەی فەرمانبەرانی هەرێمی کوردستان چارەسەر دەکرێت

ئاڤا نیوز 

 

سەرۆکی لیژنەی دارایی لە پەرلەمانی عێراق ئاشکرای دەکات کە هەولێر و بەغدا بۆ چارەسەری کۆی کێشەکان ئامادەیی ڕاستەقینەیان دەربڕیووە، بۆیە ئومێد هەیە کە تا کۆتایی ئەمساڵ پرۆسەی بەبانیکردنی مووچە بە کۆتا بێت و کێشەی دواکەوتنی مووچەی فەرمانبەرانی هەرێمی کوردستان چارەسەر دەکرێت.

 

وێنە گەورەکە: ماوەی چەند ڕۆژێکە شاندێکی لیژنەی دارایی لە پەرلەمانی عێراق لە هەرێمی کوردستانە بەمەبەستی بەدواداچوون بۆ لێکتێگەیشتنەکانی نێوان هەولێر و بەغدا لەسەر بابەتەکانی مووچە، بودجە، باج، گومرگ، دامەزراندن، پرۆسەی بەبانیکردنی مووچە و چەند پرسێکی دیکەی دارایی.

 

لێدوانی فەرمی: عەتوان عەتوانی سەرۆکی لیژنەی دارایی لە پەرلەمانی عێراق بە ئاڤا نیوزی ڕاگەیاند: لەبابەتی مووچەدا چاوەڕێین حکومەتی هەرێم ئەرکی خۆی بۆ تەواوکردنی بەبانکیکردنی مووچەی مووچۆخۆران تەواوبکات کە بەهۆیەوە بەشێوەیەکی شافاف قەبارەی خەرجییەکانی هەرێم دەردەکەوێت، بۆیە ئومێد دەکەین ئەمساڵ کۆتایی بە چارەسەری پرسی مووچە و کێشەکانی دیکە بێهێنرێت، لەم ڕوانگەیەشەوە جدیبوونی هەردوولامان بینیووە بۆ چارەسەری کێشەکان.

 

زانیاریی زیاتر: "لە کۆبوونەوەکانماندا لەگەڵ سەرۆکی حکومەتی هەرێم باسمان لەو پابەندییانە کرد کە هەرێم بەپێی یاسای بودجە لەسەریەتی جێبەجێی بکات، تا هەمووان پێکەوە بتوانین داهاتە نەوتی و نانەوتییەکان زیاد بکەین و لەوپێناوەشدا چاودێری کاری دامەزراوەکان دەکەین، لەکۆبوونەوەکانیشدا لەگەڵ بەڕێز سەرۆکی حکومەتی هەرێم بەڕوونی ئامادەییمان بینی بۆ مامەڵەیەکی شەفاف لەسەر داهاتە نەوتی و نانەوتییەکان و پابەندبوونە داراییەکانی دیکە".

 

لەلایەکی دیکەوە: پەیوەست بە دامەزراندنی سێ یەکەمی زانکۆ و پەیمانگاکانی هەرێمی کوردستانیش، سەرۆکی لیژنەی دارایی لە پەرلەمانی عێراق وتی، ئەو پرسەشیان تاوتوێکردووە "دەمانەوێت بزانین لەڕوی یاسایی و داراییەوە تاچەند دەتوانرێت  حکومەت ئەو پابەندبوونە جێبەجێ بکات".

 

خاڵی ئەرێنی: وەک سەرۆکی لیژنەی دارایی دەڵێت هەولێر و بەغدا دڵنیاییانداوە پابەندی ئەو ئەرکانە دەبن کە دەکەوێتەسەرشانیان، جەختیش دەکاتەوە کە بۆ باسکردنی ئەو پرسانە پێوستییان بە کۆبوونەوەی زیاتر و سەردانی زیاتر هەیە، بۆیەش لەسەر کۆی ئەو پرسانە داوا لە نوێنەرایەتی حکومەتی هەرێم لە بەغدا دەکەن لە کۆبوونەوە پەیوەندیدارەکاندا ئامادەبێت تابتوانن لەم ساڵەدا چارەسەرییان بکەن.